Madrid (España)
O Boletín Oficial do Estado publicou a resolución do Ministerio da Presidencia, Relacións coas Cortes e Memoria Democrática pola que se convocan as subvencións destinadas a actividades relacionadas coa recuperación da Memoria Democrática e as vítimas da Guerra Civil e da Ditadura para o ano 2020.
Con esta convocatoria, o Ministerio de Presidencia, Relacións coas Cortes e Memoria Democrática impulsa con carácter inmediato a execución de proxectos e actuacións en materia de Memoria Democrática, confirmando o seu total apoio ás entidades e asociacións memorialistas e reafirmando o seu compromiso coas vítimas.
Estas axudas concederanse en réxime de concorrencia competitiva e están destinadas a asociacións, fundacións e outras entidades privadas sen ánimo de lucro, ademais da universidades e organismos públicos de investigación, así como ás agrupacións de persoas físicas que teñan incorporados entre os seus obxectivos ou actividades os relacionados coa recuperación da Memoria Democrática e o recoñecemento das vítimas da Guerra Civil e da Ditadura.
A resolución establece catro tipos de proxectos ou iniciativas que poden ser subvencionados:
Actividades dirixidas á investigación, localización, exhumación e identificación de persoas desaparecidas en fosas da Guerra Civil e a Ditadura, así como as destinadas á dignificación das mesmas e, no seu caso, das sepulturas das persoas que morreron no exilio. Estas actividades poderán recibir axudas de ata 16.000 euros, cantidade que se pode ver incrementada ata os 30.000 euros no caso de proxectos destinados a intervencións en fosas nas que exista constancia fidedigna de que os restos que se pretenden recuperar pertencen a un número superior a 10 persoas.
Estudos e investigacións relativas á recuperación da Memoria Democrática, así como ao recoñecemento moral das vítimas da Guerra Civil e da Ditadura. As axudas para estas actividades poderán ascender a 12.000 euros.
Publicacións e organización de cursos, xornadas, conferencias, exposicións e demais eventos de tipo científico e/ou divulgativo sobre a Memoria Democrática. Neste caso a axuda ascende a 5.000 euros.
A recompilación, conservación, estudo e difusión tanto do patrimonio documental escrito, oral, audiovisual como do intelectual da Guerra Civil e/ou da Ditadura. Neste caso, a axuda prevista é de ata 10.000 euros.
Entre os criterios de valoración dos proxectos atópanse a calidade técnica e viabilidade económica do proxecto, a colaboración con outras entidades ou institucións, a experiencia, traxectoria e especialización das entidades, a incidencia do proxecto na sociedade ou o cofinanciamento do proxecto.
O prazo máximo para executar cada proxecto ou iniciativa é dun ano a partir da publicación da resolución de concesión correspondente.
O orzamento total das axudas convocadas ascende a 750.000 euros. O 60% deste importe destinarase a actividades dirixidas á investigación, localización, exhumación e identificación de persoas desaparecidas en fosas da Guerra Civil e a Ditadura, á dignificación das mesmas e, no seu caso, das sepulturas das persoas que morreron no exilio. O 40% restante empregarase nas demais actividades recollidas na resolución do Ministerio.
As subvencións só poderán cubrir os gastos que, de maneira indubitada, respondan á natureza da actividade subvencionada e realícense dentro do prazo concedido para a execución da mesma. Así mesmo, poden ser financiados gastos realizados nos tres meses anteriores á publicación da convocatoria das subvencións correspondentes.
Cabe destacar que esta subvención será compatible con outras axudas de organismos ou institucións públicos ou privados para a mesma actividade, sempre que a suma de todas as axudas non supere o custo da actividade subvencionada, tal e como dispón a normativa xeral de subvencións.