- A subdelegada participa en Láncara nunha xornada centrada na prevención e na atención ás vítimas de violencia de xénero
- Olimpia López sinala que a distancia aos servizos, a dependencia económica e o medo á falta de privacidade poden dificultar o pedimento de axuda
- Defende a formación dos profesionais e a coordinación institucional para garantir unha atención adecuada ás mulleres e aos menores
Olimpia López, subdelegada do Goberno en Lugo, participou esta tarde na xornada «Construíndo redes de apoio no ámbito rural para mulleres e familias», celebrada na Pobra de Santo Xiao, no Concello de Láncara. No encontro abordáronse a prevención e a atención ás vítimas de violencia de xénero.
Durante a súa intervención, Olimpia López advertiu das dificultades adicionais que poden afrontar as mulleres que sofren violencia de xénero no medio rural, como a distancia aos servizos, a falta de transporte, a dependencia económica ou o medo a que se coñeza a súa situación. Neste sentido, destacou a necesidade de garantir que todas as vítimas poidan acceder aos recursos de atención e protección, independentemente do seu lugar de residencia.
A subdelegada agradeceu o labor de Fademur para dar visibilidade ás necesidades das mulleres do rural e incidiu na importancia da formación dos profesionais que interveñen nestas situacións. Tamén defendeu a coordinación entre administracións, servizos sociais, persoal sanitario, Forzas e Corpos de Seguridade e entidades sociais para ofrecer unha resposta eficaz e respectuosa coas vítimas.
A subdelegada do Goberno fixo especial fincapé na protección dos nenos e das nenas que conviven con situacións de violencia de xénero e lembrou que tamén precisan atención e apoio específicos.
«Construír redes de apoio significa reducir a distancia que separa a unha persoa que sofre de alguén a quen se atreva a pedir axuda», sinalou a Olimpia López, que pronunciou un chamamento á responsabilidade compartida para que «ningunha muller, viva onde viva, sinta que ten que afrontar soa unha situación de violencia».