- A subdelegada do Goberno en Lugo supervisa un dos controis da campaña especial da DXT, que se desenvolverá ata o 11 de outubro
- As distraccións son, desde 2017, o factor concorrente máis frecuente nos sinistros de tráfico e estiveron presentes en 406 accidentes mortais en 2024
- Marcar un número no teléfono pode multiplicar por 12 o risco de sufrir un sinistro e ler ou escribir mensaxes, por seis
Olimpia López, subdelegada do Goberno en Lugo, supervisou esta mañá un dos controis da Campaña Especial de Vixilancia e Control sobre Distraccións ao Volante que a Dirección Xeral de Tráfico desenvolve ente o 5 e o 11 de outubro. A campaña, na que participa a Agrupación de Tráfico da Garda Civil, está a intensificar esta semana a vixilancia sobre as condutas que apartan a atención da condución, especialmente o uso do teléfono móbil.
Olimpia López; que estivo acompañada por Alberto González, xefe provincial da DXT en Lugo; incidiu en que “unha distracción de pouco segundos é suficiente para perder o control do que sucede na estrada e pór en risco tanto a nosa vida como a do resto de usuarios”. A subdelegada lembrou que a condución distraída ou desatenta mantense desde 2017 como o factor concorrente máis frecuente nos sinistros de tráfico. En 2024, estivo presente no 18% dos accidentes e no 30% dos sinistros con vítimas mortais, cun total de 406 casos.
Neste sentido, López fixo mención á utilización do teléfono durante a condución: “O móbil pode esperar. Unha chamada, unha mensaxe ou unha notificación nunca xustifican apartar a vista da estrada”, sinalou. Os datos recollidos pola DXT indican que un 24,7% dos condutores recoñece ler mensaxes ou consultar redes sociais mentres conduce e un 22,2% admite realizar chamadas sen empregar as mans libres.
O risco aumenta de maneira notable cando a distracción obriga a combinar accións visuais, manuais e cognitivas. Marcar un número nun dispositivo móbil mentres se conduce pode multiplicar por 12,2 o risco de sufrir un sinistro; ler ou escribir unha mensaxe, por 6,1; e localizar ou alcanzar o teléfono, por 4,8.
“Non falamos só de deixar de mirar a estrada. Ao manipular un teléfono, reducimos a nosa capacidade para percibir o que ocorre, reaccionamos máis tarde e perdemos marxe para responder ante calquera imprevisto”, explicou Olimpia López. A velocidade agrava ademais os efectos dunha distracción, ao reducir o tempo dispoñible para reaccionar. Entre os sinistros máis frecuentes asociados á falta de atención figuran as saídas de vía, as colisións co vehículo precedente e os atropelos.
O móbil, principal distracción sancionada
O uso indebido do teléfono móbil continúa sendo a distracción máis frecuente das que implica unha sanción. Na campaña desenvolvida en outubro de 2025, a Agrupación de Tráfico da Garda Civil controlou 404.258 vehículos e denunciou 7.993. En 3.283 casos, o 41,07% do total das denuncias, a infracción estaba relacionada coa utilización do teléfono móbil. Á campaña sumáronse tamén 397 municipios de 42 provincias, cuxas policías locais controlaron outros 119.841 vehículos.
Olimpia López fixo finalmente un chamamento á responsabilidade individual e lembrou que “conducir require toda a nosa atención. Evitar unha distracción é unha decisión sinxela que pode impedir un sinistro e salvar vidas”.
A normativa considera infracción grave conducir utilizando auriculares ou manipulando dispositivos de telefonía móbil, navegadores ou outros sistemas de comunicación. Suxeitar o teléfono móbil coa man durante a condución supón unha multa de 200 euros e a perda de seis puntos do permiso.