La subdelegada trasladou en nome do Goberno de España o pésame tanto á familia como persoas achegadas á vítima. “Hoxe gardamos un minuto de silencio coa dor e a indignación no corazón, porque unha vez máis temos que lamentar o asasinato dunha muller polo simple feito de selo”, manifestou Rivas, lembrando que non se trata dun caso illado, senón dunha expresión máis dunha violencia estrutural que debe combaterse desde todos os ámbitos da sociedade.

“O Goberno de España mantén un compromiso firme, activo e inquebrantable na loita contra a violencia de xénero, reforzando os recursos públicos e promovendo políticas valentes para protexer ás vítimas, concienciando á cidadanía e garantindo que ningún crime quede impune”, sinalou a subdelegada apelando á responsabilidade e á importancia de denunciar e de apoiar a todas as vítimas.

“Non pode haber igualdade real mentres sigan morrendo mulleres” recalcou, facendo alusión á responsabilidade colectiva e ao traballo das institucións para erradicar calquera signo de violencia contra a muller.