La subdelegada do Goberno nA Coruña, María Rivas volveu lembrar hoxe, con motivo da visita ao Posto de Mando Avanzado desde o que se coordinarán todas as actuacións en materia de seguridade da noite de San Xoán coruñesa, o dispositivo especial de seguridade previsto que contará con máis de 120 efectivos das Forzas e Corpos de Seguridade do Estado, Policía Local e servizos de emerxencia. “Un dispositivo que despregamos para garantir a seguridade e para facer desta noite de San Xoán unha celebración segura”, resumiu.
A subdelegada destacou que este operativo "se mellora ano a ano" e inclúe a participación de todas as unidades especializadas da Policía Nacional, como os TEDAX, guías caninos —que inspeccionarán o paseo marítimo e os aparcadoiros soterrados—, o equipo de subsolo, así como as brigadas móbiles que farán labores preventivas nas estacións de tren, autobús e outros puntos estratéxicos da cidade, en coordinación coa Policía Local.
Ademais, utilizaranse drones con capacidade para detectar e inhibir aparellos non autorizados e contarase cunha embarcación da Garda Civil que realizará labores de vixilancia no mar, e coa colaboración de Salvamento Marítimo no caso de ser necesario.
Otro dos aspectos destacables será a integración da Policía Nacional nos Puntos Violeta instalados polo Concello ao longo do Paseo Marítimo, prestando atención especializada ante posibles casos de violencia de xénero.
“Máis aló do despregamento técnico, queremos facer especial fincapé na prevención de roubos, por iso pedimos a todas as persoas que se acheguen a gozar da festa que colaboren seguindo as indicacións e evitando levar obxectos de valor innecesarios”, indicou Rivas, quen recoñeceu o labor de todos os corpos implicados neste dispositivo especial. “Quero agradecer ás forzas e corpos de seguridade, policía local, protección civil e a todo o persoal de emerxencias que esta noite fará posible que a celebración sexa a protagonista”, remarcou.