O delegado do Goberno en Galicia, Pedro Blanco, destacou hoxe en Santiago o “apoio sen fisuras” do Goberno de España para potenciar o densevolvemento e crecemento das empresas galegas. Facer durante o acto da Cámara de Comercio, onde se presentou a Memoria de actividade do ano 2024, un balance do labor desenvolvido ao longo do ano pasado e co que se apoiaron a máis de 3.500 empresas e autónomos, mobilizando máis de 1 millón de euros a través de programas financiados con fondos europeos.
“Sodes sinónimo de dinamismo, de tradición e de calidade, formando parte da identidade de Santiago e da súa proxección de futuro”, remarcou Pedro Blanco durante o acto, no que felicitou á Cámara polo traballo e compromiso, “facendo crecer o comercio local, as pequenas empresas que crean cidade, que cohesionan o territorio e que fan máis grande a Galicia”.
“Como sempre digo, non hai futuro sen emprego de calidade”, engadiu facendo referencia as máis de 30.000 empresas con presenza nunha trintena de concellos.
Pedro Blanco aproveitou a súa intervención para lembrar o compromiso do Goberno de España cos galegos e galegas demostrando con feitos que “estamos ao voso lado e somos o voso mellor aliado na xeración de riqueza, levando a cabo iniciativas que reflicten esta realidade na que o compromiso do Goberno coas empresas, co comercio e con Santiago é firme e real”.
Neste sentido, sinalou que as pemes e os autónomos son os grandes protagonistas en Galicia a través do Plan de Recuperación do Goberno, que inclúe “as maiores medidas de apoio ao tecido comercial e empresarial da nosa historia recente” converténdoo nunha peza fundamental para situar a nosa comunidade “nun contexto de crecemento sostido de creación de emprego”, puntualizou o delegado.
Unha realidade baseada nos datos pois “catro de cada dez beneficiarios do Plan de Recuperación en Galicia son pemes”, con centos de millóns de euros inxectados “para impulsar a transformación dixital das empresas ou adaptar o comercio de proximidade ás novas tecnoloxías”. Unhas cifras que, segundo o delegado do Goberno en Galicia, demostran que “as pequenas e medianas empresas están a aproveitar esta oportunidade única”.