A Dirección Xeral de Tráfico (DXT) e a Agrupación de Tráfico da Garda Civil en Galicia inician mañá, día 15 de maio, unha campaña de vixilancia e control sobre o colectivo de motocicletas nas estradas galegas. A iniciativa, que se prolongará ata o domingo día 18, ten como peculiaridade que se levará a cabo de forma exclusiva en Galicia por iniciativa das Xefaturas Provinciais de Tráfico e do Sector de Tráfico de Galicia da Garda Civil.
Esta programación responde á subida rexistrada nos últimos anos no número de motociclistas falecidos en accidentes de circulación en Galicia e tamén ao comezo do período do ano no que se incrementa o uso deste tipo de vehículos por mor do bo tempo. Segundo os datos da DXT, unha de cada catro vítimas mortais en accidentes de tráfico en 2024 eran motociclistas e esta porcentaxe apenas decreceu no que vai de ano 2025. O ano pasado faleceron 22 motoristas en sinistros de tráfico nas estradas galegas e ata o 30 de abril deste ano/este ano son 4 as persoas que faleceron neste tipo de accidentes.
Ademais, desde as Xefaturas Provinciais de Tráfico alertan que este número rexistra incrementos progresivos nos últimos anos. De feito, en 2024 incrementouse un 57% os motoristas falecidos en accidentes de tráfico con respecto ao ano anterior.
Ao tempo, detéctase un aumento dos danos e da gravidade dos accidentes onde están implicadas motocicletas, ata 224 en Galicia o pasado ano que rexistraron algún dano de tipo persoal (persoas feridas leves ou graves ou persoas falecidas).
Control e sensibilización
A campaña persegue un dobre obxectivo: de control e de sensibilización. Con respecto ao primeiro, vixiarase o cumprimento das normas por parte do colectivo de motoristas, pois tamén se comprobou, entre outras, que repuntan os excesos de velocidade entre os e as motoristas.
Con respecto á sensibilización, a campaña quere concienciar ao colectivo de motoristas sobre a súa vulnerabilidade na estrada. Nesta liña, incidirase na necesidade de facerse visibles e usar os sistemas de protección específicos, como os cascos, así como a indumentaria adecuada (calzado de protección, luvas, mono, chaqueta protectora, ...) imprescindible para unha maior seguridade do condutor ou condutora.
Junto a este público prioritario, a campaña engade un segundo nivel de sensibilización que é o concienciar ao resto de usuarios e usuarias das vías sobre a elevada exposición ao risco das persoas que conducen motocicletas e a necesidade de manter o nivel de alerta constante cando coincidan con estes vehículos na súa viaxe. Neste caso, as recomendacións inciden en: a necesidade de reducir ou moderar a velocidade; manter a distancia de seguridade; prestar especial atención en cruzamentos, xiros ou preferencias de paso; mirar polos espellos retrovisores para confirmar a posible presenza de motocicletas; e usar as luces intermitentes con suficiente antelación para sinalizar as manobras.