La subdelegada do Goberno nA Coruña, María Rivas, visitou hoxe o municipio de Camariñas acompañada da xefa da Unidade Contra a Violencia sobre a Muller da Subdelegación, Manuela Vilaboy, para recoller a maleta viaxeira contra a violencia de xénero (MAVI) e coñecer algunhas das actividades que se desenvolveron neste concello co obxectivo fomentar a igualdade e concienciar sobre a necesidade de seguir avanzando na loita contra a violencia machista.
En concreto, a subdelegada acudiu ao IES Pedra da aguia onde puido dialogar coas participantes do Club de Lectura Arao, que hoxe organizaron un taller de decoración de bolsas de tela (coñecidas como ‘totebags’), e comentar a súa experiencia cos 14 títulos escritos por mulleres que forman parte da MAVI. “Estas actividades, que se desenvolven no marco do 8M, Día Internacional de la Mujer, son fundamentais para promover unha sociedade máis igualitaria e libre de violencia de xénero”, indicou Rivas.
María Rivas lembrou que actualmente na provincia da Coruña hai 2.685 casos activos no sistema VioGén de protección de vítimas de violencia de xénero, polo que MAVI é “unha ferramenta esencial para favorecer un pensamento crítico ante estereotipos e roles de xénero que se perpetúan socialmente e promoven a violencia de xénero”.
A maleta viaxeira contén 14 títulos escritos por mulleres entre os que se atopan ‘Mentiras para ser unha muller de verdade. Manual para principiantes’ de Rocío Salazar e ‘Aqueles días en que mos era malas’ de Inma López Silva; así como libros dirixidos ao público infantil como poden ser ‘Hai algo máis aburrido que ser unha princesa rosa?’ de Raquel Díaz Reguera ou ‘Contos de boas noites para nenas rebeldes’ de Elena Favilli e Francesca Cavallo. Tamén incorpora un diario no que as persoas lectoras que así o desexen poidan reflexar a súa experiencia a través de comentarios ou suxestións co obxectivo de contribuír a enriquecer esta iniciativa que pretende ser dinámica e mellorar no seu percorrido.
A maleta viaxeira iniciou a súa viaxe en Vimianzo en 2022 e desde entón ten percorrido 13 concellos, o Centro de Inserción Social da Coruña, e a ONG Fiet e continúa a súa viaxe, posto que na actualidade conta con preto de 30 solicitudes.
En Camariñas permanecía desde o pasado 8 de novembro, “polo que serviu de apoio a datas tan sinaladas como o 25N, Día Internacional da Eliminación da Violencia contra a Muller, e o 8M, Día Internacional de la Mujer”, indicou a subdelegada. En total hai cinco maletas diferentes viaxando pola provincia. Mañá a subdelegada estará nas Somozas facendo entrega dunha delas no Centro Cívico municpal, mentres que o resto irán parar aos concellos e institucións da provincia que así o soliciten.