A Delegación do Goberno en Galicia informa de que a Dirección Xeral de Tráfico (DXT) iniciará mañá, luns 10 de marzo, unha campaña especial de control e vixilancia sobre o uso do cinto de seguridade e dos Sistemas de Retención Infantil (SRI), que se estenderá ata o vindeiro domingo, día 16.
Durante toda esta semana, as persoas integrantes do Sector e Subsectores de Tráfico da Garda Civil, xunto con as policías municipais daqueles concellos que se sumen á iniciativa, levarán a cabo estes controis. O obxectivo desta campaña é concienciar sobre a importancia do uso dos sistemas de retención homologados, cinto de seguridade e SRI.
Segundo os últimos datos da DXT, en Galicia o 20 das persoas que faleceron en accidentes de tráfico en turismos en 2024 non facían uso do cinto. Estes datos son especialmente preocupantes xa que o uso do cinto reduce á metade o risco de falecemento en caso de accidente e nun 77% en caso de envorcar do vehículo. A capacidade de protección do cinto é igualmente efectiva respecto de todos os ocupantes, pasaxeiros que viaxen nos asentos dianteiros, e tamén nos asentos traseiros.
A campaña consistirá nun importante incremento dos controis coa utilización do máximo número de medios humanos e materiais dispoñibles. Así mesmo, sempre que sexa posible, tanto os paneis de sinalización variable como as pantallas alfanuméricas dos vehículos da Agrupación de Tráfico da Garda Civil advertirán aos condutores da existencia próxima de controis.
Campaña especial do ano pasado
Na mesma campaña do ano pasado controláronse 49.853 vehículos en Galicia dos cales 1.030 foron denunciados. Dos vehículos controlados, 44.528 eran turismos (854 denuncias); 1.061 eran taxis (2 denuncias); 716 foron autobuses (11 denuncias) e 3.548 eran vehículos de transporte de mercadorías (163 infraccións).
Conviene lembrar que desde o ano 2022 coa entrada en vigor da nova reforma da Lei sobre Tráfico, Circulación de Vehículos a Motor e Seguridade viaria, non facer uso, ou non facer de forma adecuada, do cinto de seguridade e dos sistemas de retención infantil supón unha perda de 4 puntos e unha multa de 200 euros.
A vixilancia e aplicación da lei no que respecta ao uso do cinto e sistemas de retención consolidouse como un dos métodos máis efectivos para manter e incrementar o índice de uso do cinto entre os ocupantes dos vehículos. Neste sentido cabe destacar a instalación de cámaras de control automatizado do uso do cinto de seguridade, das cales o 60% están situadas en vías convencionais, onde se rexistra maior accidentalidade, e os 40% restantes en vías de alta ocupación.