La subdelegada do Goberno nA Coruña, María Rivas, destacou en Vedra os 19,2 millóns de euros que inviste o Goberno na provincia a través dos Plans de Sustentabilidade Turística que están a permitir a transformación do modelo actual por outro baseado en principios como a conservación do patrimonio e o respecto do medio ambiente.
La subdelegada aproveitou a inauguración das XXIX xornadas ao redor da camelia en Santa Cruz de Rivadulla (Vedra) para lembrar que este concello é un dos 63 que se benefician na provincia destes plans, que promoven a modernización de 13 destinos turísticos. “Trátase de recuperar o patrimonio cultural e pór en valor iniciativas que promovan un turismo máis sustentable e os innumerables atractivos de Galicia e da nosa provincia, como é neste caso a camelia”, abundou Rivas.
Ao respecto desta flor, a subdelegada celebrou que teña este recoñecemento na provincia. “Sabemos que gusta de ambientes húmidos e chans acedos, pero tamén que é unha flor moi delicada e moi exquisita á hora de escoller onde germinar, por iso celebro o seu bo gusto ao elixir a nosa terra para facer”, sinalou.
María Rivas, ademais de inaugurar as xornadas foi a encargada de facer entrega do agasallo á parroquia de Vilanova polo seu traballo ornamental e ao Pazo de Santa Cruz de Ribadulla. También foi testemuña do irmandamento entre as entidades promotoras dos eventos de exaltación das camelias entre Vedra e Padrón, concello que estivo representado pola súa concelleira de Turismo, Chus Campos.
María Rivas, que estivo acompañada polo alcalde de Vedra, Carlos Martínez, afirmou que a camelia “é unha flor que xa fixo de Galicia o seu reino” e que xa ten lugares de culto na provincia como Santa Cruz de Ribadulla, en Vedra; casa-museo de Rosalía de Castro en Padrón; a alameda de Santiago de Compostela, ou os xardíns do Pazo de Mariñán, en Bergondo.
Tamén destacou as propiedades beneficiosas dos aceites que se extraen das súas follas, tanto para alimentación como para cosmética, así como o feito de que estas sexan materia prima para a obtención do té, “unha bebida que tamén se empeza a asentar en Galicia e na provincia da Coruña con produtores xa recoñecidos”, apuntou.