Tui, 7 de xaneiro de 2025- O subdelegado do Goberno, Abel Losada, acompañado do alcalde de Tui, Enrique Cabaleiro, visitou o edificio da rúa do Bispo Martiñón no que se van a realizar obras de rehabilitación para dispor de tres vivendas destinadas a aluguer social. As obras están cofinanciadas polo Goberno de España, a través do Ministerio de Vivenda, que asinou un convenio coa Xunta de Galicia para financiar un total de 24 vivendas para esta fin repartidas polos concellos de Ribadavia, Ourense, Viveiro, Ferrol e Betanzos, ademais de Tui.
Losada subliñou que as obras de Tui contan con financiamento do Plan de Recuperación, Transformación e Resiliencia (PRTR) do Goberno de España, polo que deben, ademais de cumprir esixentes requisitos de eficiencia enerxética, destinarse a aluguer social por un prazo mínimo de 50 anos.
“Estas cousas”, recalcou o subdelegado, “convén dicilas, de maneira amable, pero firme, porque moitas veces escoitando aos responsables da Xunta de Galicia parece que se pon moito empeño en tratar de ocultar a participación do Goberno de España”. O subdelegado mostrou a súa sorpresa de que se diga que son “fondos europeos”, “como dando a entender que eses fondos caen do ceo e non son o froito da pelexa do Goberno de España nos distintos foros da Unión Europea por conseguilos, todo elo con escasa ou nula axuda, por certo”.
Abel Losada felicitou a Enrique Cabaleiro por impulsar a rehabilitación do edificio da rúa Bispo Martiñón, unha iniciativa máis que Tui vai sacar adiante cos fondos europeos que reparte o Goberno de España a través do Plan de Recuperación e do que o propio Concello tamén foi beneficiario para actuacións como a reforma da praza de abastos ou o novo centro cultural multiusos.
Ademais, recalcou que, agora mesmo, a provincia de Pontevedra está a recibir 18 millóns de euros de fondos estatais para a construción de case 400 vivendas públicas en Pontevedra, Vigo, Mos e Tui e case 10 millóns de euros para programas de rehabilitación de 1.320 vivendas en barrios de Pontevedra, Vigo, Marín, As Neves, Ponteareas, O Porriño e Mondariz-Balneario. Unha cifra que considerou “moi necesaria para sacar a Galicia da parálise total destes últimos 15 anos en políticas de vivenda pública por parte da Xunta de Galicia, que é a Administración competente”.