Un total de 7.742 persoas están convocadas este fin de semana nas sedes da Coruña e de Vigo aos procesos selectivos da oferta pública de emprego (OPE) para os subgrupos A2, C1 e C2 da Administración Xeral do Estado. As probas distribuiranse en horario de mañá e tarde na xornada do sábado.
A Delegación do Goberno en Galicia colabora co Ministerio de Transformación Dixital e Función Pública na organización e desenvolvemento destes procesos na Comunidade. Para iso, mobiliza un total de 482 persoas, empregadas públicas, para as tarefas de organización, loxística e vixilancia das probas. Estas desenvolveranse en instalacións das universidades da Coruña e de Vigo, nun total de 145 aulas repartidas por 6 facultades dos campus de Elviña (UDC) e Lagunas Marcosende (UVI), respectivamente.
En total, son 10 procesos selectivos de ingreso libre e promoción interna para o Corpo de Xestión e o Corpo de Xestión de Sistemas e Informática da Administración do Estado (subgrupo A2); para o Corpo Xeral Administrativo (C1), Corpo de Técnicos Auxiliares de Informática da Administración do Estado (C1) e para o Corpo Xeral Auxiliar da Administración do Estado (C2).
Todas as probas celebraranse na xornada do sábado en horario de mañá, excepto as probas do subgrupo A2, que celebrarán na xornada de tarde a proba do suposto práctico.
Do total de persoas convocadas, 4.446 teñen como sede de exame A Coruña e 3.296, a cidade de Vigo.
A convocatoria destes procesos foi publicada o pasado 10 de xullo no BOE, e oferta 31.689 prazas distribuídas entre acceso xeral e promoción interna. 2.828 destas prazas están reservadas para persoas con discapacidade.