Pontevedra, 5 de novembro de 2024.- El subdelegado do Goberno en Pontevedra, Abel Losada, destacou hoxe que a habilitación dos corpos de Policía Local da provincia de Pontevedra para a realización de controis preventivos de drogas vai redundar nunha importante mellora na seguridade viaria, dado que a partir de agora poderanse realizar un maior número deste tipo de controis.
Losada visitou esta mañá o exercicio práctico, que se desenvolveu na estrada PO-531 en Campañó-Pontevedra, e que tivo lugar ao final das dúas xornadas de formación teórica no marco do curso impartido pola Dirección Xeral de Tráfico (DXT) na sede do Comandancia da Garda Civil de Pontevedra. A actividade serviu para a formación e habilitación de axentes da policía local na detección de drogas en controis preventivos.
Participaron axentes das policías locais de Baiona, Nigrán, Gondomar, Salceda de Caselas, Sanxenxo, Tomiño e Vilagarcía de Arousa. Cubriuse así, por estrita orde de inscrición, o límite das 30 prazas ofertadas. Máis aló destes concellos, xa realizan probas de sustancias estupefacientes as policías municipais doutras grandes vilas e cidades como Marín, O Porriño, Pontevedra, Vigo, Tui ou Redondela.
Abel Losada aproveitou a visita ao exercicio práctico en estrada para informar de que no ano 2023 realizáronse na provincia de Pontevedra 3.773 probas de detección de drogas por parte do Subsector de Tráfico da Garda Civil, das que 2.006 (53,26%) foron positivas. Deste total, 1.023 das probas foron realizadas coincidindo con fins de semana, festivos e vésperas de festivos, cando se da un maior consumo deste tipo de sustancias. Doutra banda, 2.978 probas realizáronse no transcurso de controis preventivos, mentres que 356 leváronse a cabo con ocasión dunha infracción e 439 tras un accidente de tráfico.
El subdelegado tamén desvelou que no 90% dos casos con resultado positivo nos controis de drogas, estes foron detectados en homes. As sustancias máis detectadas, como vén sendo habitual, foron o cannabis, presente en 1.481 controis e a cocaína, en 781.
O subdelegado do Goberno subliñou a necesidade da formación continua para actualizar as habilidades na detección de consumo de drogas ao volante, un problema que foi en aumento, especialmente tras a pandemia. Destacou que “é vital adaptar as técnicas de detección ás novas necesidades e riscos para a seguridade viaria” e solicitou responsabilidade aos condutores “alertando de que conducir baixo o efecto das drogas non só pon en risco a integridade de quen consome, senón de persoas inocentes que comparten estrada”. Lembrou, ademais, que a Lei de Seguridade viaria prohibe a condución con drogas no organismo e o Código penal estipula sancións severas por conducir imprudentemente baixo a súa influencia, con penas que poden chegar ata 4 anos de cárcere en casos de homicidio.
Durante dúas xornadas de curso os asistentes aprenderon técnicas para detectar o consumo de drogas e os aspectos xurídicos asociados á tramitación de denuncias. O seminario permitiu profundar nos aspectos farmacolóxicos e toxicolóxicos das drogas, os seus efectos e patróns de consumo, así como nas técnicas para identificar signos externos relacionados co seu uso. Tamén se revisaron os procedementos para a toma de mostras e os aspectos normativos e lexislativos que afectan á condución baixo a influencia destas sustancias.