El subdelegado do Goberno en Ourense, Eladio Santos, realizou esta mañá unha visita institucional ao Concello de Parada de Sil, para coñecer xunto ao seu alcalde, Aquilino Domínguez, e o edil de Cultura e presidente do GDR Ribeira Sacra, Paco Magide, a situación actual do municipio, así como os proxectos de relevancia levados a cabo con fondos estatais, como a chegada da banda larga e as melloras en eficiencia enerxética.
En cuanto a a implantación do Programa ÚNICO-Banda Larga, que o Ministerio de Economía, Comercio e Empresa puxo en marcha en 2020 para achegar a banda larga a todos os puntos de España, o subdelegado comprobou os grandes resultados do mesmo durante a súa visita. “Un exemplo é o pequeno núcleo rural de Caxide, en Parada de Sil, onde teñen dispoñibilidade total de banda larga e gran velocidade de Internet, achegando as telecomunicacións máis vangardistas aos núcleos rurais máis pequenos, permitindo atraer e fixar poboación, residentes no mundo urbano que poden vivir aquí e desenvolver sen problema a súa actividade laboral”, destacou Santos.
Así mesmo, o subdelegado abordou co rexedor diversas melloras realizadas con achegas estatais, as cales supoñen un importante aforro ás arcas municipais, como é o cambio da iluminación pública por luminarias LED, grazas a 200.000 euros recibidos a través do IDAE; e a instalación de placas solares fotovoltaicas na Casa do Concello, cunha subvención de 40.000 euros. Neste sentido, trataron as accións incluídas no Plan de Sustentabilidade Turística en Destino, do Ministerio de Industria e Turismo, que financia o 50% do investimento. E, ademais, lembraron a contribución do Pacto de Estado Contra a Violencia de Xénero, que destinou 1.613 euros a Parada de Sil, para iniciativas relacionadas con esta importante problemática.
Eladio Santos fixo fincapé durante a súa visita en que este concello é “exemplo de dinamización turística e do mundo rural, xa que incentivou a colaboración institucional con outros concellos e institucións provinciais para crear o Consorcio Turístico da Ribeira Sacra que impulsa toda a comarca”. E precisamente en canto á posta en valor dos seus recursos, tamén lembrou que acaba de publicarse a resolución provisional da convocatoria de subvencións para o financiamento de proxectos innovadores promovidos por entidades locais para a transformación territorial, do Ministerio de Transición Ecolóxica e Reto Demográfico, e na que se inclúe o proxecto de posta en valor do Mosteiro de Santa Cristina de Ribas de Sil, cun importe de 115.000 euros.
Sector gandeiro e vitivinícola
Ademais, Eladio Santos destacou o “gran potencial” no sector gandeiro e vitivinícola de Parada de Sil, que pertence á DO Ribeira Sacra, “dúas fontes de riqueza fundamentais, unidas ao seu patrimonio natural, da Rede Natura de Espazo Protexido, e ao cultural e artístico”, enumerou.
Precisamente neste sentido, o alcalde, Aquilino Domínguez, transmitiulle a súa preocupación polos gandeiros cuxas explotacións se están vendo afectadas os efectos da Enfermidade Hemorrágica Epizoótica (EHE), “xa que seguen sen recibir o diñeiro da Xunta para gastos farmacéuticos ou de desinfección, a pesar de que o Ministerio de Agricultura hai un mes que transferiu 2,8 millóns de euros á Consellería de Medio Rural para este fin. Hai unha parálise total”, denunciou.
Ademais, os representantes municipais tamén están preocupados polo sector vitivinícola, ante a ausencia de solucións da Xunta de Galicia á sobreproducción de viño tinto. “Está a dar lugar a que moitos viñedos estean a quedar sen vendimiar e moitos viticultores están a ver como non son capaces de vender o seu produto a ningunha adega. Trátase dun problema gravísimo estrutural, no que o sector vitivinícola da Ribeira Sacra vese afectado e non se están habilitando medidas de continxencia nin axudas, nin se analiza o problema de face a próximos anos para atopar unha solución”, concluíu o subdelegado.