Vilagarcía, 10 de outubro de 2024.- El subdelegado do Goberno en Pontevedra, Abel Losada, informou hoxe de que o Subsector de Tráfico da Garda Civil da provincia de Pontevedra denunciou, tan só no primeiro semestre deste ano 2024, a un total de 1.787 condutores por facer uso indebido do teléfono móbil. Ademais, outras 144 denuncias tiveron que ver co manexo de auriculares e 6 máis co uso de dispositivos audiovisuais doutro tipo.
O subdelegado ofreceu estes datos no marco da presentación da campaña especial que a Dirección Xeral de Tráfico (DXT) está a desenvolver contra as distraccións ao volante en toda España, entre o día 7 e o 13 deste mes. Losada visitou na N-640la, ao seu paso por Vilagarcía, un control conxunto da Garda Civil e da Policía Local, onde advertiu de que “cando se conduce a atención debe estar na estrada e non no teléfono móbil, nin ningún outro dispositivo ou obxecto”. A campaña céntrase nos tramos máis perigosos e por este motivo o control tivo lugar nunha travesía, espazo no que ademais conflúe a actuación da Garda Civil de Tráfico e das Policías Locais.
También participaron no encontro o alcalde, Alberto Varela, a concelleira responsable de Tráfico e Mobilidade, Tania García, a xefa provincial da DXT, Paula Yubero, o tenente coronela da Garda Civil de Tráfico, Fernando Tato, e o xefe da Policía Local de Vilagarcía, José Prego.
Abel Losada agradeceu a colaboración do Concello de Vilagarcía e da Policía Local nesta campaña, o que nas súas palabras “demostra a implicación deste alcalde, deste goberno local e desta Policía Local en materia de seguridade viaria”. Incidiu en que as distraccións están detrás do 31% dos accidentes con vítimas mortais e que o 76% dos condutores e condutoras recoñecen conducir mentres se distraen con dispositivos, comida, bebida, tabaco, etcétera. Así mesmo, segundo os datos da DXT, o 23% recoñece ler mensaxes de WhatsApp directamente do móbil mentres está ao volante.
Por último, o subdelegado do Goberno indicou que “esta mesma campaña supuxo o ano pasado na provincia de Pontevedra o control preventivo de 4.692 vehículos e a formalización de 839 denuncias.
O alcalde, polo seu lado, fixo fincapé en que “cando usamos as novas tecnoloxías ao volante non só estamos a pornos en risco a nós mesmo, senón tamén ás persoas que nos/nos acompañan ou aos condutores que comparten vía”. Así, agradeceu ao Goberno e á DXT a posta en marcha desta campaña de concienciación e control e a súa presentación na localidade, á vez que insistiu en “non cometer o erro de empregar o móbil mentres conducimos”.