La subdelegada do Goberno en Lugo, Isabel Rodríguez, inaugurou hoxe co comandante xefe do CMT de Parga, José Antonio Roldán, a exposición estática de material militar no CIFP As Mercés con motivo das actividades complementarias do Día Das Forzas Armadas.
Acompañados de autoridades do campo local e mandos e persoal militar explicaron que o obxectivo principal desta actividade dirixida a escolares lucenses é o de achegar o traballo diario dos militares á sociedade civil, observando en primeira persoa o seu traballo con vocación de servizo e apoio á sociedade.
Durante a actividade, o alumnado coñeceu os distintos equipos co que levan a cabo os seus labores co fin de proporcionarlles un mellor coñecemento da unidade no marco da seguridade e a defensa. Do mesmo xeito, asistiron ás explicacións facilitadas polo comandante, descubrindo a dotación e utilidades dos materiais expostos en distintas estacións.
La subdelegada agradeceu o labor de divulgación dos militares “cun marcado carácter didáctico á hora de explicar o seu labor nun centro de ensino, abrindo o corpo á cidadanía e establecendo sinerxias entre o mundo civil e militar”. Ademais, recoñeceu “o compromiso que demostran día a día coa defensa e a seguridade cidadá, pero tamén en ocasións especiais como este Día das Forzas Armadas, que se configura como unha xornada de encontro e comunicación entre a cidadanía e os militares para estreitar lazos ao fío do establecido pola Constitución”, subliñou.