El Goberno amplía a súa aposta pola innovación tecnolóxica do 6G cunha nova axuda de 5M€ para tres entidades da provincia

O Ministerio para a Transformación Dixital e da Función Pública vén de publicar a resolución definitiva da convocatoria do programa UNICO I+D 6G 2023. O programa destinará 5,1 millóns de euros de fondos europeos NextGenerationEU do Plan de Recuperación a 5 proxectos da provincia co obxectivo de fortalecer o ecosistema de investigación ao redor da próxima xeración de tecnoloxía móbil.
A Universidade de Vigo, que recibirá 4.585.626 de euros para desenvolver tres proxectos, é a principal entidade beneficiaria da provincia, xunto con a empresa viguesa Optase Solutions, que terá unha axuda de 272.696 euros e a porriñesa Quobis Networks, que disporá dunha achega de 262.177 euros. As tres entidades, que repiten como beneficiarias do programa un ano máis, acaparan máis do 8% dos fondos repartidos en cada unha das liñas de axudas – a primeira, destinada a mellora da infraestrutura e equipos de investigación universitarios e a segunda, dedicada a iniciativas empresariais de desenvolvemento experimental 5G+–.
Abel Losada incidiu en que estas “achegas consolidan a área de Vigo como polo de referencia científico-técnica, cunha Universidade e empresas #capaz de competir, atraer e reter investimentos e axudas, situando á provincia á cabeza no mapa de desenvolvemento da tecnoloxía 6G”.
O subdelegado lembrou que estes investimentos se suman aos máis de 7,4 millóns de euros repartidos na convocatoria anterior. En total, o Goberno investiu máis de 12,5 millóns de euros para desenvolver doce proxectos na provincia “e situar a Vigo á vangarda desta tecnoloxía disruptiva”, recalcou.
Estratexia de impulso da tecnoloxía 5G e 6G
A estratexia de impulso do 5G e 6G elaborada polo Goberno persegue liderar o despregamento destas tecnoloxías en Europa como eixo prioritario da Axenda España Dixital investindo para iso preto de 1.500 millóns de euros en global. A intención é que o país poida usar esta tecnoloxía como elemento transformador económico e social.
Con este obxectivo, puxéronse en marcha programas que cobren todas as fases de desenvolvemento destas novas tecnoloxías de comunicación móbil en España con máis de 300 millóns de axudas. Todo iso, acompañado do investimento de máis de 1.000 millóns de euros para ampliar o despregamento das infraestruturas para dotar de cobertura 5G a municipios de menos de 10.000 habitantes por todas as provincias de España.