O subdelegado do Goberno en Pontevedra, Abel Losada, informou de que o Ministerio de Cultura e Deporte vén de licitar por 1.275.945 euros o contrato para a redacción do proxecto e a dirección das obras de rehabilitación que converterán o antigo convento de San Francisco na nova sede do Arquivo Histórico Provincial de Pontevedra.
O subdelegado do Goberno celebrou esta nova “xa que supón un avance na materialización dunha antiga demanda dos pontevedreses e pontevedresas, que reclamaban a reforma e uso deste emblemático edificio, situado en pleno corazón da cidade, e un novo investimento do Goberno en Pontevedra”.
La licitación do proxecto, que como destacou Abel Losada permitirá “recuperar para a cidade unha peza moi singular do seu patrimonio”, permanecerá aberta ata o 25 de xuño.
En paralelo ao procedemento para a contratación da redacción deste proxecto de reforma, desde a semana pasada xa está en marcha outra licitación, por importe de 599.904,19 euros, para a reparación integral da cuberta. En total, á falta da adxudicación das obras de reforma interior para o futuro Arquivo, xa se mobilizaron 1,8 millóns de euros no marco desta actuación.
O Arquivo Histórico Provincial
A actual sede do Arquivo Histórico Provincial de Pontevedra, situada desde 1960 na Casa dos Fonseca, no Paseo de Colón, é insuficiente para albergar todos os seus fondos, que desde o ano 2001 espállanse, ademais, por unha serie de baixos alugados.
O fin de solucionar estes problemas de falta de espazo, o Ministerio de Cultura decidiu trasladar o Arquivo á antiga sede da Delegación de Facenda na cidade, situada nunha parte do Convento de San Francisco, un inmoble que precisa da rehabilitación integral en marcha.