La nova Unidade de Tramitación de Expedientes de Estranxeiría (UTEX), dependente do Ministerio de Inclusión, Seguridade Social e Migracións, xa está a pleno rendemento en Vigo unha vez completada a posta en marcha e a formación do equipo humano de 50 persoas que a integra. A UTEX, que desde febreiro pasado comezou a resolver procedementos, recibiu onte a visita da subsecretaria do Ministerio, Cristina Asacia, e do director xeral de Migracións, Carlos Mora, quen visitaron as instalacións na rúa de García Barbón, 36 e compartiron impresións co persoal.
A coordinadora, Mar Martínez Pacheco, acompañada dos xefes de servizo, deu conta de que a UTEX responde a un novo modelo de xestión para o apoio ás oficinas de Estranxeiría máis saturadas de España. A día de hoxe aténdense xa expedientes procedentes de Madrid, Barcelona, Baleares, Tenerife, Gipuzkoa, Lleida, Xirona, Navarra, Asturias, Segovia e Teruel. Polo momento impúlsase a tramitación e resolución dos cartóns de longa duración, longa duración da Unión Europea, familiar comunitario, permanente comunitario e as autorizacións por arraigamento familiar. En breve comezarán as tramitar tamén os permisos de estudos destas 11 provincias e as que se vaian incorporando.
A UTEX é unha unidade centrada no traballo por obxectivos e froito diso son os case 100.000 expedientes que pretende “mover” no seu primeiro ano de funcionamento, o que supón unha porcentaxe próxima ao 10% que pode ir incrementándose ata o 15% ou mesmo ata o 20% do volume administrativo que xeran as Oficinas de Estranxeiría ás que dá apoio.
A nova Unidade responde a un modelo de Administración deslocalizada e completamente dixitalizada, con “cero papel”, áxil e eficaz. Ao mesmo tempo abre as portas a unha redución de custos e tamén á homologación en toda España na tramitación de expedientes tan complexos como os da área de Estranxeiría.