O delegado do Goberno en Galicia, Pedro Blanco, coñeceu hoxe, da man das directivas de Greenalia e da xermana P2X, o ‘Proyecto Breogán’ que promoven ambas as empresas en terreos do polígono de Curtis.
O delegado mostrou o seu interese por este proxecto, pioneiro en Galicia, e convidou as empresas a non deixar a “magnífica oportunidade” que representan os fondos do Plan de Recuperación do Goberno, en concreto as axudas para a descarbonización industrial e o fomento da economía circular.
En este sentido, Pedro Blanco destacou a aposta que o Goberno de Pedro Sánchez está a facer nestes anos pola transformación da economía e do modelo produtivo galego da man destes fondos e das axudas de Transición Xusta, “que permiten camiñar cara a un modelo máis verde, sustentable e menos dependente dos combustibles fósiles”.
Precisamente, o Proxecto Breogán, aínda nunha fase moi incipiente, vai na liña de reducir a dependencia dun sector tan estratéxico como a aviación dos combustíbeis fósiles tradicionais. A idea destas empresas é levantar unhas novas instalacións industriais xunto a planta de biomasa que Greenalia ten en Curtis para capturar C02, producir hidróxeno verde e elaborar combustibles sustentables para a aviación (SAF polas súas siglas en inglés) que contribúan a mitigar a pegada ecolóxica deste sector.
Á reunión, celebrada na Delegación do Goberno, asistiron, ademais do delegado, o CEO de Greenalia, Manuel García, que estivo acompañado do CSO e directora de Desenvolvemento Corporativo, Beatriz Mato; o CEO en España, María Moreno, e o responsable de Eólica Mariña e Novas Tecnoloxías de Greenalia, Raúl Martín, mentres que por parte de P2X acudiron o seu CEO, Detlev Woesten, e Kirsten Grastorffe, responsable de relacións internacionais.