El delegado do Goberno en Galicia, Pedro Blanco, sinalou hoxe que a consolidación do Porto Exterior da Coruña é froito do “compromiso político, a lealdade institucional e a complicidade empresarial”. Así o afirmou no acto de conmemoración dos 20 millóns de toneladas de mercadorías movidas na dársena de Punta Langosteira. Tras pór en valor o traballo de todas as administracións nestes 20 anos, sinalou que esta conmemoración certifica que Langosteira é un dos principais centros loxísticos do norte de España e “referenda que tiñamos razón cando diciamos que o Porto Exterior era obrigado querer impulsar a actividade económica da área metropolitana”.
Pedro Blanco fixo extensivo este recoñecemento ás empresas que apostaron e apostan pola dársena de Punta Langosteira para impulsar os seus negocios, e sen as que porto “non tería sentido”. Sinalou que os resultados desta dársena son reflexo do “traballo conxunto das administracións coas empresas” e agradeceu a “valentía empresarial” na aposta dos empresarios e empresarias por esta área loxística para os seus negocios. A eles reiterou o apoio do Goberno para seguir traballando polo progreso e benestar de Galicia, e que se manifesta, por exemplo, no Plan de Recuperación do Goberno, “do que xa se benefician 25.000 empresas de Galicia”.
700 millóns en investimentos
El delegado sinalou que o compromiso do Goberno cos portos de interese xeral elevouse nos últimos anos ata os 700 millóns de euros en investimentos, “para garantir a súa competitividade e avanzar na súa modernización e na sustentabilidade ambiental”.
“O porto da Coruña é exemplo deste compromiso”, sinalou, lembrando o fito que suporá a terminación da ligazón ferroviaria, que xa executa o ADIF cun investimento superior aos 150 millóns de euros, e a próxima execución da rede ferroviaria interior. E sinalou que estes investimentos servirán para “dar un impulso ao Eixo Atlántico e tamén á competitividade do transporte ferroviario de mercadorías”.
A este compromiso coas infraestruturas, Pedro Blanco engadiu o impulso a investimentos en enerxías renovables como a eólica mariña e o hidróxeno verde, “en resposta ás demandas da nosa economía e do noso empresariado”. Como reflexo deste apoio, a Autoridade Portuaria da Coruña sitúase como sétimo perceptor de fondos do Plan de Recuperación do Goberno, segundo a listaxe publicada a semana pasada polo Ministerio de Asuntos Económicos.