A Delegación do Goberno informa da recente resolución da Secretaría de Estado de Igualdade pola que o Goberno transfire 1,7 millóns de euros aos concellos de Galicia para financiar accións que desenvolven dentro do Pacto de Estado contra a violencia de xénero.
Segundo acordou este departamento do Ministerio de Igualdade, os concellos de Galicia recibirán este ano 1.779.012,52 euros para a implantación de medidas e programas para a loita contra a violencia machista dentro do Pacto de Estado contra a Violencia de Xénero. Por provincias, os concellos da provincia da Coruña recibirán 685.612,26 euros; os de Lugo, 223.532,81€; a provincia de Ourense, 316.772,52€ e os concellos de Pontevedra recibirán 553.094,93€.
Os criterios de repartición foron establecidos polo Real Decreto 503/2022, do 27 de xuño. A unha cantidade fixa por cada municipio únense cantidades variables en función dos criterios de poboación, a incorporación ao Sistema de Seguimento Integral nos casos de Violencia de Xénero (Sistema VioGen) do Ministerio do Interior e a existencia de vítimas usuarias do Servizo Telefónico de Atención e Protección para vítimas da violencia de xénero (Atenpro) empadroadas no municipio ao 1 de xuño de 2023.
Os concellos deberán destinar estes fondos a programas para a erradicación da violencia sobre a muller. Así, poderán realizar campañas de sensibilización e prevención; reforzar os servizos municipais de atención e información ás vítimas de violencia contra a muller ou realizar actuacións encamiñadas á formación especializada continuada de profesionais do ámbito local en materia de igualdade entre mulleres e homes.
Desde o 2018 ata 2023, o Goberno de España transferiu 9.125.889,45 euros aos concellos de Galicia para impulsar accións contra a violencia machista. Un investimento que responde á decisión do Goberno de Pedro Sánchez de ampliar as competencias locais na loita contra a violencia machista e de acompañalas do financiamento necesario. O Goberno recoñeceu con esta decisión o papel esencial dos municipios na difusión e apoio ás medidas de eliminación da violencia sobre as mulleres, de calquera tipo.
Investimentos de 14,7 millóns de euros en 2023
Tan só neste ano 2023, o Goberno de España destina a Galicia máis de 14,7 millóns de euros para políticas contra a violencia de xénero, dos cales, 13 millóns de euros irán destinados a Xunta e 1,7 millóns, aos concellos.
Dentro de os fondos destinados a Xunta, 11 millóns de euros deberán dedicarse a actuacións do Pacto de Estado contra a Violencia de Xénero. A esta transferencia únese un millón de euros procedentes da Delegación do Goberno contra a Violencia de Xénero. Esta cantidade dedicarase a financiar programas de asistencia social integral destinados ás vítimas de xénero (439.581€), programas para a implementación de plans personalizados (63.594,35€), programas de apoio a vítimas de agresións ou abusos sexuais (529.763€) e programas de prevención de abusos sexuais en menores tuteladas (43.854€).
Por último, a Xunta recibe tamén este ano 1,2 millóns de euros para estender e facer accesibles os servizos de atención integral a todas as potenciais vítimas de todas as formas de violencia contra as mulleres. Esta cantidade forma parte do Plan de Recuperación, Transformación e Resiliencia e supón o último pago do programa para crear centros de atención permanente a vítimas da violencia sobre a muller nas catro provincias galegas.