Isabel Rodríguez e Lara Méndez avanzan unha nova colaboración entre Goberno e Concello para mellorar a formación dos axentes da Policía Nacional

Esta colaboración enmárcase no convenio asinado entre a Secretaría de Estado de Seguridade e o Concello de Lugo para que os profesionais da Policía Nacional en Lugo poidan adestrar na galería de tiro da Policía Local A subdelegada agradeceu a sensibilidade e o compromiso da rexedora por facilitar unhas instalacións municipais para o uso da Policía Nacional e remarcou que este acordo é un exemplo da estreita colaboración que manteñen as dúas institucións pola defensa da seguridade dos lucenses

La subdelegada do Goberno en Lugo, Isabel Rodríguez, e a alcaldesa de Lugo, Lara Méndez, informaron este venres que desde hoxe os axentes da Policía Nacional da Comisaría Provincial de Lugo e os adscritos á Xunta de Galicia na cidade xa poden realizar as prácticas de tiro nas dependencias da Policía Local, en San Fiz. Esta colaboración enmárcase no convenio de colaboración asinado entre a Secretaría de Estado de Seguridade e o Concello de Lugo para que os profesionais da Policía Nacional en Lugo poidan adestrar na galería de tiro durante os próximos catro anos, podendo ser prorrogado por outros catro máis. O acordo inclúe o deber da Comisaría Provincial de Lugo de participar nos gastos de mantemento desta infraestrutura.

A subdelegada e a Alcaldesa supervisaron, acompañadas do comisario principal xefe provincial, José María Esteban; e o intendente Jesús Piñeiro; así como da concelleira da área de Gobernación, Paula Alvarellos; o inicio das prácticas de tiro por parte dos axentes da Policía Nacional. Isabel Rodríguez explicou que ata a actualidade, os policías nacionais levaban a cabo os exercicios de tiro nun camión galería, coas limitacións que o es presentaba. “O acceso a este equipamento redundará nunha mellora da formación dos axentes que poderán realizar máis horas de prácticas e con máis versatilidade”, apuntou Rodríguez.

Durante o encontro, a subdelegada agradeceu a sensibilidade e o compromiso da rexedora por facilitar unhas instalacións municipais para o uso da Policía Nacional e remarcou que este acordo é un exemplo da estreito e intensa colaboración que manteñen Goberno de España e Concello de Lugo co obxectivo de velar pola defensa da seguridade dos lucenses e consolidar a Lugo como unha das cidades máis seguras do territorio.

Así mesmo, incidiu no clima de cooperación existente entre as dúas institucións en asuntos policiais, polo que destacou a posibilidade de que as instalacións contribúan tamén a mellorar a eficacia da Policía Nacional coa utilización compartida, pois ambos os corpos realizan operacións conxuntas.