La subdelegada do Goberno nA Coruña, María Rivas, desprazouse ata o Subsector de Tráfico da Coruña para presentar a campaña especial de control e vixilancia sobre o transporte escolar, que se desenvolve durante esta semana, ata o venres 26 de maio.
Tal y como destacou a subdelegada, durante estes días unha vintena de efectivos da Garda Civil de Tráfico, así como as policías locais dos doce municipios que se sumaron á campaña, intensificarán as inspeccións sobre estes vehículos, comprobando que as autorizacións e documentos que teñen son os correctos para a prestación do servizo. Ames, Bergondo, Cambre, Carral, Ferrol, Mugardos, Narón, Oleiros, Rianxo, Santiago, Teo e Valdoviño son os 12 municipios da provincia que se adheriron á campaña.
Verificarán tamén que as condicións técnicas e os elementos de seguridade do vehículo sexan os que esixe a normativa, así como outras cuestións como os tempos de condución e descanso.
María Rivas destacou a importancia deste tipo de campañas xa que na última que se fixo na provincia, en decembro do ano pasado, controláronse 167 vehículos, dos cales foron denunciados 139, mentres que se formularon 293 denuncias. En canto á campaña que se está desenvolvendo, tramitáronse xa 100 denuncias.
As irregularidades administrativas son as que maior número de denuncias xeraron, 6 de cada 10. Entre as causas destas infraccións administrativas, destacan non dispor da autorización especial para realizar transporte escolar, a antigüidade máxima dos vehículos ou non subscribir un seguro de responsabilidade civil ilimitada, tal e como esixe a lei.
María Rivas subliñou que o transporte escolar está sometido a unha serie de normas “e do seu cumprimento depende en moitos casos a seguridade dos pequenos e pequenas que viaxan nos vehículos polo que é a nosa responsabilidade esixir que estas se cumpran” ben a través de campañas como esta, dos centros educativos ou desde as propias asociacións de nais e pais que se encargan de contratar as rutas.
Durante esta campaña controlarase especialmente que se circula á velocidade permitida, que non se fai uso do teléfono móbil ou outros aparellos que supoñan distracción para os condutores ou condutoras. Tamén se farán controis de alcol e drogas. Ademais prestarase especial atención ao uso do cinto naqueles autobuses escolares que o leven instalados.
María Rivas explicou que, segundo as propias estatísticas que manexa a Dirección Xeral de Tráfico, a maioría dos accidentes que se producen durante o transporte escolar, o 90% teñen lugar no momento de subir ou baixar do vehículo, ou xusto nos instantes inmediatos e, en moitos casos, trátase de atropelos causados por unha distracción do menor, do condutor do transporte escolar ou dos acompañantes. Unha gran parte dos sinistros con lesións graves están relacionadas coa ausencia do uso adecuado dos cintos de seguridade.
Esta campaña ten unha especial transcendencia en Galicia debido á gran extensión de rutas de transporte escolar existentes na comunidade. Galicia é a comunidade española con máis rutas de transporte escolar, entre os públicos e os contratados en todos os niveis educativos. Segundo os datos das autoridades educativas, en cada curso académico préstase servizo de transporte escolar a máis de 95.000 alumnas e alumnos de preto de 900 centros educativos públicos, concertados e privados de toda Galicia.
Na presentación da campaña, a subdelegada do Goberno estivo acompañada polo Xefe de Sector de Tráfico da Garda Civil en Galicia, o Tenente Coronela Antonio Fidalgo e polo subjefe da Dirección Provincial da DXT, Adrián Pedreira Durante o desenvolvemento da campaña, a Dirección Xeral de Tráfico (DXT) coordinará aos axentes da Agrupación de Tráfico da Garda Civil e ás policías locais para comprobar que os autobuses escolares e os seus condutores cumpren coa normativa establecida na materia.