Redondela, 4 de maio de 2023.- A subdelegada do Goberno en Pontevedra, Maica Larriba, participou esta mañá na entrega de carnés de ciberexpertos outorgados pola Policía Nacional a 267 alumnos e alumnas de dez colexios de Redondela. A subdelegada estivo acompañada polo xefe superior de Policía de Galicia, Ramón Gómez Nieto, polo comisario provincial, Juan José Díaz; polo comisario de Vigo-Redondela, Ramiro José Gómez; e pola alcaldesa do municipio, Digna Rivas. Para obter este carné os estudantes tiveron que superar satisfactoriamente un curso de formación no uso seguro de internet.
O programa, cunha duración de cinco horas lectivas, está dividido en dez unidades didácticas nas que, entre outras cuestións, incídese en aspectos como o ciberacoso, a suplantación de identidade, o grooming, o sexting, tecnoadiccións, normas para manter a privacidade dos usuarios, así como recursos e consellos para realizar unha navegación segura. A subdelegada do Goberno felicitou ao alumnado pola superación deste curso e recoñeceu o labor que realiza a Policía Nacional para formar en seguridade no uso de internet, recalcando aos estudantes a importancia de coñecer non só as vantaxes, senón tamén os riscos que implican o uso destas tecnoloxías e de comunicar aos seus pais, escola ou á Policía cando detecten un destes perigos.
Maica Larriba subliñou a importancia de recibir este tipo de formación e de que os menores saiban recoñecer que determinadas condutas que se realizan a través de internet son consideradas un delito. Así mesmo, a subdelegada insistiu ao alumnado na importancia de que transmitan os coñecementos adquiridos na súa contorna familiar, “axudando así a pais, avós e avoas no uso das novas tecnoloxías”.