O Goberno de España, a través da Delegación do Goberno en Canarias, abriu o prazo para a solicitude das axudas ou subvencións do Sistema de Protección Civil do Ministerio do Interior para as persoas físicas ou xurídicas afectadas polas recentes inundacións nos termos municipais de Teguise e Arrecife, na illa de Lanzarote.
Estas axudas, cuxa concesión se atopa regulada pola Lei Xeral de Subvencións e as súas disposicións regulamentarias de desenvolvemento, polo Real Decreto 307/2005, do 18 de marzo, e polo Real Decreto 477/2007, do 13 de abril, poderán solicitarse presentado a debida documentación ata o próximo 14 de maio na Dirección Insular da Administración Xeral do Estado en Lanzarote ou en calquera dos rexistros oficiais recollidos no artigo 16.4 da Lei 39/2015, do 1 de outubro, do Procedemento Administrativo Común das Administracións Públicas.
A concesión destas axudas terá carácter subsidiario respecto de calquera outro sistema de cobertura de danos, público ou privado, nacional ou internacional, do que poidan ser beneficiarios os afectados.
No entanto, cando os mencionados sistemas non cubran a totalidade dos danos producidos, as subvencións concederanse con carácter complementario e serán compatibles en concorrencia con outras subvencións, indemnizacións, axudas, ingresos ou recursos, procedentes de sistemas públicos ou privados, nacionais ou internacionais, ata o límite do valor do dano producido.
Entre outros, poderán ser beneficiarios destas axudas, nos termos e requisitos establecidos no Real Decreto 307/2005, do 18 de marzo, os seguintes:
- As unidades familiares ou de convivencia económica que sufran danos persoais ou materiais, ponderándose, para estes efectos, a contía da axuda en proporción aos recursos económicos de que dispoñan para facer fronte a unha situación de emerxencia ou catástrofe.
- As Corporacións Locais que acrediten escaseza de recursos para facer fronte aos gastos derivados de actuacións ante situacións de grave risco ou natureza catastrófica.
- As persoas físicas ou xurídicas que, requiridas pola autoridade competente, levasen a cabo unha prestación persoal ou de bens, por mor dunha situación de emerxencia.
- As persoas físicas ou xurídicas titulares de establecementos mercantís, industriais ou de servizos, con menos de cincuenta empregados, cuxos locais de negocio ou bens afectos a esa actividade fosen danados directamente polos feitos derivados da situación de emerxencia ou de natureza catastrófica.
Máis información dispoñible na páxina web da Dirección Xeral de Protección Civil e Emerxencias do Ministerio do Interior: