Madrid, España
O Boletín Oficial do Estado de hoxe, 22 de agosto, publica o anuncio da convocatoria de subvencións para o ano 2023 destinada a proxectos e actuacións de Memoria Democrática. A partir de mañá, as entidades interesadas en participar dispoñen de nun prazo de quince días hábiles para presentar as solicitudes correspondentes.
Estas subvencións, promovidas polo Ministerio da Presidencia, Relacións coas Cortes e Memoria Democrática, contan cun orzamento global de 895.000 euros e están dirixidas a asociacións, fundacións e outras entidades privadas sen ánimo de lucro, ademais da universidades e organismos públicos de investigación.
A convocatoria establece tres liñas de axudas, atendendo ás características dos proxectos ou iniciativas que poden ser subvencionados:
− Estudos e investigacións relativas á recuperación da Memoria Democrática, así como ao recoñecemento moral das vítimas da Guerra Civil e da Ditadura, para os que se poderá optar a axudas ata un máximo de 12.000 euros cada unha.
-Publicacións e organización de cursos, xornadas, conferencias, exposicións e demais eventos de tipo científico e/ou divulgativo sobre a Memoria Democrática. Nestes supostos, cada axuda individual poderá ascender a 5.000 euros.
− A recompilación, conservación, estudo e difusión do patrimonio documental escrito, oral, audiovisual (fotografías, carteis, gravacións sonoras, películas…) ou intelectual (manifestacións artísticas, musicais, literarias…), da Guerra Civil e/ou da Ditadura. Cada proxecto poderá obter subvencións ata 10.000 euros.
O orzamento repartirase entre as tres liñas de axuda, destinándose ata 480.000 euros a proxectos de estudos e investigacións; ata 180.000 euros a actividades de publicacións e organización de cursos; e ata 235.000 euros para actuacións de recompilación de patrimonio.
As subvencións concederanse en réxime de concorrencia competitiva e entre os criterios de valoración das solicitudes atópanse a calidade técnica dos proxectos presentados, a súa difusión e a colaboración con outras entidades, ademais da incidencia do proxecto na sociedade e a atención de maneira singular á Memoria Democrática das mulleres. Ademais, serán compatibles con outras axudas, provenientes de organismos ou institucións públicos para a mesma actividade, sempre que a suma de todas as axudas non supere o custo da actividade subvencionada.