O Goberno de España declarará as manifestacións feministas do 8 de marzo como Lugar de Memoria Democrática, pola súa contribución á consolidación da democracia e os dereitos das mulleres en España.
O Boletín Oficial do Estado publicou esta mañá a incoación do expediente. O día 8 de marzo foi instaurado en 1975 polas Nacións Unidas como o Día Internacional da Muller, en recordo ás primeiras manifestacións feministas que empezaron a convocarse en Nova York, desde onde se foi estendendo ao longo de numerosos países nos anos seguintes.
As reivindicacións feministas en España tomaron forza nos primeiros anos do século XX e avanzaron de maneira destacada en España durante os anos da Segunda República (1931-1936), cando o movemento feminista alcanzou logros como o dereito ao voto, a instauración do matrimonio civil, o divorcio ou o acceso universal á educación.
“Estas conquistas e dereitos foron suprimidos coa chegada da ditadura, cando o papel da muller volveu quedar relegado ao ámbito privado e doméstico”, sinalou o secretario de Estado de Memoria Democrática, Fernando Martínez, que lembra que, coa recuperación da democracia e a primeira manifestación feminista autorizada en España o 8 de marzo de 1978, “o movemento feminista volveu coller impulso, e reclamou os dereitos perdidos e a ampliación doutros que xa se consolidaron na Europa democrática”.
O secretario de Estado valorou positivamente o inicio do expediente de incoación das manifestacións feministas en España porque “as manifestacións de cada 8 de marzo convertéronse en mareas democráticas e de homenaxe ás mulleres que lideraron a loita pola igualdade entre mulleres e homes, e nun exemplo para as futuras xeracións. Réndese, así, homenaxe aos miles de mulleres que foron loitando ao longo destes anos pola consecución dos dereitos e liberdades de todas as mulleres”.