O ministro de Política Territorial e Memoria Democrática, Anxo Víctor Torres, asistiu á reunión do Consello de Política Fiscal e Financeira (CPFF), que presidiu a vicepresidenta cuarta do Goberno e ministra de Facenda e Función Pública, María Jesús Montero.
Na reunión deuse conta ás comunidades autónomas da decisión do Ministerio de Facenda de flexibilizar o obxectivo de déficit das CCAA de 2024, que pasará a ser do 0,1%, o que supón unha décima máis de marxe fiscal respecto do obxectivo de equilibrio orzamentario fixado para as CCAA no Programa de Estabilidade de abril remitido á Comisión Europa. Isto significa que o obxectivo de déficit das CCAA en 2024 será de 0,1%.
Esa décima de maior marxe fiscal para as CCAA asumiraa a Administración Xeral do Estado, que será unha vez máis quen terá que facer un maior esforzo de redución de déficit como ocorreu durante a pandemia e a guerra de Ucraína.
Ademais, o Ministerio de Facenda comunicou ás CCAA que en 2024 recibirán os maiores recursos do sistema de financiamento da súa historia con 154.467 millóns de euros. É un incremento do 14,9% respecto de 2023, o que supón que recibirán case 20.000 millóns de euros máis que o ano pasado para fortalecer as súas políticas públicas. Esa cifra inclúe os 134.658 millóns das entregas a conta, un 8,3% máis que en 2023, e a liquidación de 2022, que ascende a 20.746 millóns.
As CCAA recibiron un 40% máis de recursos nos cinco últimos anos, en comparación cos cinco anos anteriores a ese período, o que representan case 180.000 millóns máis para as comunidades autónomas.
Con respecto á débeda autonómica, o Estado asumirá parte da débeda de todas as comunidades autónomas de réxime común sen excepción, tanto das que están subscritas ao Fondo de Liquidez Autonómico (FLA) como as que teñan endebedamento con entidades financeiras.