A ministra de Política Territorial e Portavoz do Goberno, Isabel Rodríguez, destacou que “España e Portugal traballan de forma intensa para facer da ‘Raia Ibérica’ un territorio de oportunidades”. Neste sentido, e en cumprimento da Estratexia Común acordada en 2020, o Cume de Viana do Castelo de novembro pasado adoptou pasos concretos para profundar na cooperación.
“O groso das medidas que se impulsan ten como protagonistas a rexións, autonomías ou entidades locais, concretamente, unha trintena de entidades vinculadas á cooperación local, moitas delas conformadas por municipios a ambos os dous lados da raia que se suman hoxe a esta iniciativa”, engadiu.
Isabel Rodríguez, que asinou o documento de constitución da Rede de Cooperación Transfronteiriza España-Portugal (REDCOT), xunto á súa homóloga portuguesa, a ministra de Cohesión Territorial, Ana Abrunhosa, subliñou a importancia do mundo local: “Coñezo a importancia da Administración local para a execución de políticas transformadoras, o desenvolvemento económico dos territorios, lograr a cohesión social e mellorar a vida da xente”.
A Rede que hoxe se constitúe será tamén un modelo para a cooperación transfronteiriza noutros ámbitos, como a prevención da violencia contra as mulleres e a violencia de xénero.
Interviñeron tamén no acto, xunto ás dúas ministras, o secretario xeral español para ao Reto Demográfico, Francisco Boya, e a secretaria de Estado portuguesa de Desenvolvemento Rexional, Isabel Ferreira.