- O ministro de Política Territorial e Función Pública e o presidente da FEMP coinciden en impulsar reformas lexislativas do ámbito local e atender as cuestións que reclama o municipalismo
O ministro de Política Territorial e Función Pública, Miquel Iceta, e o presidente da Federación Española de Municipios e Provincias (FEMP) e alcalde de Vigo, Abel Caballero, mantiveron hoxe a súa primeira reunión institucional na que abordaron os principais asuntos de interese para as entidades locais.
A reunión enmárcase dentro dos contactos que o ministro iniciou cos principais interlocutores do ministerio, entre eles, a FEMP, a asociación de entidades locais de ámbito estatal con maior implantación e que representa a 7.324 entidades locais, máis do 90%.
Impulso a reformas lexislativas para as entidades locais
Durante a reunión, abordáronse distintos asuntos, como os fondos europeos ou o impulso a reformas lexislativas importantes para as entidades locais, anunciadas polo ministro o pasado xoves na súa primeira comparecencia na Comisión de Política Territorial e Función Pública do Congreso.
Iceta adiantou no Congreso a reforma da Lei de Racionalización e Sustentabilidade da Administración Local (LRSAL), que “limitou a capacidade de gasto dos concellos, sen introducir ningunha reforma estrutural no réxime xurídico nin da facenda local e recortou competencias municipais”.
O ministro tamén avanzou a aprobación do Estatuto Básico do Municipio de Menor Poboación “que queremos traer ás Cortes canto antes”, no marco da Estratexia Fronte ao Reto Demográfico, para dar aos pequenos municipios máis facilidades para exercer as súas funcións e “garantirlles a calidade democrática e a prestación dos servizos públicos”.
A FEMP, aliado preferente
“A FEMP é para este Goberno a referencia no ámbito municipal”, destacou o ministro. Así mesmo, Iceta puxo en valor o papel das administracións territoriais e, concretamente, das entidades locais, no impulso á cogobernanza.
Hai que lembrar que, ademais de avanzar nunha máis estreita colaboración, o 26 de outubro pasado a FEMP participou por primeira vez na Conferencia de Presidentes, e desde hai meses está presente no Consello Interterritorial do Sistema Nacional de Saúde (CISNS), que precisamente se volveu a reunir esta tarde.
Doutra banda, o ministro e o presidente da FEMP aceptaron a invitación da presidenta do Senado, Pilar Llop, para celebrar a próxima reunión da Comisión Nacional de Administración Local (CNAL) na Cámara Alta.