A ministra de Política Territorial e Función Pública, Carolina Darias, asegurou que “a pandemia da COVID-19 está a deixarnos moitas leccións, unha é que as persoas con responsabilidades públicas estamos compelidas a buscar un mínimo común de entendemento, actuando de maneira coordinada desde as distintas administracións, para facer fronte á emerxencia sanitaria e abordar a reconstrución social e económica que necesitamos”.
Durante a súa intervención na Comisión Xeral de Comunidades Autónomas do Senado, Carolina Darias puxo de manifesto que gañar a batalla á pandemia, salvando vidas, contendo a propagación, protexendo a saúde e seguridade da cidadanía, e comezar a reconstrución económica e social do noso país para mitigar os seus efectos, é o maior reto ao que se enfronta o Estado autonómico nas últimas décadas. “A cidadanía espera dos seus representantes un comportamento cívico acorde co seu sacrificio, que sexamos capaces de alcanzar un mínimo común de entendemento para reconstruír este país”.
As institucións están a ser sometidas a “unha durísima proba de esforzo”, subliñou a ministra, que puxo en valor a capacidade das institucións para funcionar eficazmente nestes momentos, tal e como acredita o dispositivo de entendemento, coordinación e colaboración entre o Goberno de España e os das CCAA.