O Goberno constituíu hoxe a Comisión Interministerial de resignificación do Val de Cuelgamuros para impulsar e coordinar as medidas para a súa transformación nun centro de interpretación.

O ministro de Política Territorial e Memoria Democrática, Anxo Víctor Torres, explicou que a Comisión ten como principal obxectivo “converter esa contorna nun espazo que fomente os valores constitucionais e democráticos e no que se promova o coñecemento e a reflexión sobre o noso pasado”.

Este procedemento de resignificación comprende un gran número de medidas que implican a participación de varios departamentos ministeriais. Por iso, e co fin de asegurar o adecuado impulso e coordinación das medidas que deben ser adoptadas, o Consello de ministros do 11 de xuño creou o órgano interministerial que hoxe se constitúe e no que participan todos os departamentos ministeriais afectados na resignificación do monumento.

A Comisión, que se reunirá unha vez ao mes, está presidida polo ministro de Política Territorial e Memoria Democrática, Anxo Víctor Torres, e intégrana os ministros de Presidencia, Xustiza e Relacións coas Cortes, Félix Bolaños; a vicepresidenta primeira e ministra de Facenda, María Jesús Montero; a vicepresidenta segunda e ministra de Traballo e Economía Social, Yolanda Díaz; a vicepresidenta terceira e ministra para a Transición Ecolóxica e o Reto Demográfico, Teresa Ribera; o ministro de Transportes e Mobilidade Sustentable, Óscar Puente; a ministra de Vivenda e Axenda Urbana, Isabel Rodríguez; o ministro de Cultura, Ernest Urtasun; a ministra de Ciencia, Innovación e Universidades, Diana Morant; e a presidenta do Consello de Administración do Patrimonio Nacional, Ana da Cova Fernández. Exerce a secretaría da Comisión o secretario de Estado de Memoria Democrática, Fernando Martínez.