- As actuacións comprenderán a rehabilitación do valado histórico do Paseo do Rei.
- Os traballos tamén modernizarán os medios de elevación e mellorarán a accesibilidade xeral da estación.
O Ministerio de Transportes e Mobilidade Sustentable, a través da operadora pública Renfe, avanza na mellora da estación de Príncipe Pío con novas actuacións destinadas a reforzar a conservación da contorna histórica mediante a rehabilitación do valado do Paseo do Rei. Ademais, procederase a modernizar os medios de elevación, mellorar a accesibilidade, a seguridade e a mobilidade das persoas viaxeiras.
O edificio da estación pertence á arquitectura modernista de finais do século XIX e mantén parte dos seus elementos orixinais polo que está catalogado como edificio singular. A súa fachada conserva o seu estilo imperial mentres que o seu interior foi completamente adaptado para ser unha estación moderna, funcional e accesible.
Inmoble histórico-artístico
A licitación das obras, cun importe máximo de 705.973,87 euros, finalizou o pasado 21 de setembro. A actuación está considerada de máxima urxencia polos condicionantes técnicos e patrimoniais do proxecto, polo que a empresa adxudicataria deberá contar coa clasificación necesaria para intervir en bens inmobles histórico-artísticos.
Ademais, a través dun expediente independente ao de rehabilitación do valado histórico de Paseo do Rei, Renfe adxudicou unha actuación adicional relacionada coa substitución dos medios de elevación da estación.
A intervención contempla a renovación integral dos medios de elevación de Príncipe Pío, mediante a substitución de trece escaleiras mecánicas e da actual plataforma elevadora por un novo ascensor. Así mesmo, inclúe as actuacións necesarias para adecuar estas instalacións á normativa vixente e mellorar as súas condicións de operatividade, seguridade, protección contra incendios, drenaxe e accesibilidade.
Con estas actuacións, Renfe reforza o seu compromiso coa modernización das súas instalacións e coa mellora continua da experiencia de viaxe. Unha vez executada esta fase, quedarán pendentes de renovación os dous ascensores encostados á fachada do teatro e as dúas escaleiras mecánicas do acceso por Paseo do Rei, actuacións previstas dentro da renovación integral da estación que Adif ten planificado acometer.