A ministra de Ciencia e Innovación, Diana Morant, destacou que o Goberno de España está a fortalecer o sistema científico e tecnolóxico dos territorios para mellorar a vida dos cidadáns e facer de España un país de futuro e benestar.
O Goberno cuadriplicará o investimento anual ao Sistema de Observación e Predición Costeiro das Illas Baleares
28/02/2023
O Goberno cuadriplicará o investimento anual ao Sistema de Observación e Predición Costeiro das Illas Baleares
O Consello de Ministros aprobou este martes o acordo polo que o Ministerio de Ciencia e Innovación vai destinar 46,5 M € ao Sistema de Observación e Predición Costeiro das Illas Baleares (SOCIB) entre 2024 e 2033, o que supón case cuadriplicar a achega media anual ao pasar de 1,2 M € entre 2007 e 2023 a 4,6 M € entre 2024 e 2033.
A ministra de Ciencia e Innovación, Diana Morant, destacou que o Goberno de España está a fortalecer o sistema científico e tecnolóxico dos territorios para mellorar a vida dos cidadáns e facer de España un país de futuro e benestar.
SOCIB 2030: Xemelgo Dixital do Mediterráneo
Este investimento contribuirá ao desenvolvemento dunha nova instalación denominada SOCIB 2030: Xemelgo Dixital do Mediterráneo, unha representación dixital do Mar Mediterráneo que simulará -con datos en tempo real e datos históricos- posibles escenarios de futuro mediante modelos de predición.
Esta ferramenta innovadora e interactiva axudará a protexer o medio mariño e a costa, a dar respostas a crises ambientais en tempo real e a facer fronte ao cambio climático. Tamén permitirá achegar o coñecemento aos cidadáns, ao sector público e privado e mellorar a toma de decisións.
De forma adicional, o Ministerio de Ciencia e Innovación está a destinar 7,5 millóns de euros para cofinanciar, xunto ao Govern Balear, a nova sede do SOCIB no Polo Mariño de Baleares.
O Ministerio tamén concedeu máis de medio millón de euros ao SOCIB grazas aos fondos europeos do Plan de Recuperación, Transformación e Resiliencia para a mellora do seu equipamento.
O SOCIB
O SOCIB é un consorcio financiado ao 50% polo Ministerio de Ciencia e Innovación e o Govern Balear que forma parte do mapa español de Infraestruturas Científicas e Técnicas Singulares (ICTS).
Está constituído por unha rede de instalacións e equipos dedicados á observación e a investigación do medio mariño e a súa actividade céntrase no Mediterráneo Occidental, incluíndo as Illas Baleares e zonas adxacentes.