- O SEPE destina máis de 25 millóns de euros a financiar programas Tándem dirixidos a mozos e mozas estranxeiros tutelados e extutelados polas administracións públicas
- A solicitudes poden presentarse por vía electrónica ata o 24 de agosto incluído
A subdelegada do Goberno en Lugo, Olimpia López, anima ás entidades do terceiro sector da provincia a presentar proxectos á nova convocatoria de subvencións do Servizo Público de Emprego Estatal (SEPE), dotada con 25 millóns de euros e destinada a financiar programas experienciais de emprego e formación Tándem.
Esta convocatoria está dirixida as persoas novas estranxeiras cuxa garda e tutela sexa ou fose asumida polas administracións públicas e as entidades interesadas dispoñen ata o 24 de agosto para presentar as súas solicitudes, que deberán formalizarse por vía electrónica a través da sede do SEPE.
Neste sentido, a subdelegada destaca que " o compromiso do tecido asociativo de Lugo coa inclusión e a igualdade de oportunidades é clave para a nosa sociedade” e anima “ás entidades do terceiro sector da provincia para presentar os seus proxectos e aproveitar esta ocasión para ofrecer formación e emprego remunerado á mocidade migrante, que ten maiores dificultades para acceder ao mercado laboral”.
A convocatoria ten como finalidade financiar proxectos que combinen formación, emprego remunerado e acompañamento, favorecendo a inserción laboral de mozos migrantes tutelados e extutelados mediante itinerarios de cualificación profesional en alternancia coa práctica laboral. Poderán solicitar estas axudas as entidades privadas sen ánimo de lucro que acrediten a xestión de recursos habitacionais para persoas novas tuteladas ou extuteladas, así como aquelas con experiencia na xestión de programas públicos de políticas activas de emprego que colaboren con este tipo de entidades. Tamén poderán concorrer agrupacións de entidades.
Os programas terán unha duración de 12 meses. Durante os tres primeiros, as persoas participantes recibirán formación exclusiva con dereito a unha bolsa do SEPE e, nóvenos meses seguintes, combinarán a formación cun contrato de formación en alternancia, adquirindo experiencia profesional remunerada.
As accións formativas poderán desenvolverse en ámbitos como a recuperación e promoción do patrimonio histórico, artístico, cultural ou natural, a rehabilitación de contornas urbanas e naturais, a eficiencia enerxética, as enerxías renovables, as actividades baseadas na tecnoloxía dixital ou calquera outra actividade de utilidade pública ou interese social que facilite a inserción laboral das persoas participantes.
Con esta convocatoria, o Goberno de España reforza o apoio ás entidades sociais que traballan coa mocidade migrante máis vulnerable, impulsando proxectos que combinan cualificación profesional, experiencia laboral e acompañamento para favorecer a súa plena integración social e laboral.