- A subdelegada do Goberno en Lugo subliñou que o Ministerio de Transportes leva realizado un traballo intensivo nas estradas lucenses para garantir a mobilidade e a seguridade viaria despois dos temporais deste inverno
- As obras atópanse na súa fase final, con actuacións puntuais en diferentes tramos da A-6, a A-8, a N-6, a N-540, a N-547, a N-634, a N-640 e a N-642
A subdelegada do Goberno en Lugo, Olimpia López, supervisou en Lugo os traballos de emerxencia que o Ministerio de Transportes e Mobilidade Sustentable está a executar na rede estatal de estradas, en concreto na N-VIN, para a rehabilitación de firmes tras as borrascas.
Olimpia López subliñou que “o Ministerio de Transportes leva realizado un traballo intensivo nas estradas lucenses para garantir a mobilidade e a seguridade viaria despois dos temporais deste inverno, investindo na provincia ao redor de dez millóns de euros”.
As obras, que se atopan na súa fase final, contemplan actuacións puntuais en diferentes tramos da A-6, a A-8, a N-6, a N-540, a N-547, a N-634, a N-640 e a N-642.
Durante a visita, a subdelegada destacou que estas actuacións forman parte do Plan Especial de Reparación e Conservación de Estradas do Estado en Galicia, unha intervención extraordinaria coa que o Goberno de España está a dar resposta para os efectos do tren de borrascas rexistrado nos últimos meses.
Os traballos que se están executando consisten no fresado e reposición do firme nos tramos máis deteriorados, con espesores variables en función do estado da vía, actuando en distintos puntos comprendidos entre varios puntos quilométricos destas estradas. Adicionalmente, levarase a cabo a reposición das marcas viarias nos tramos afectados pola rehabilitación do firme.
Finalmente, a subdelegada incidiu en que este esforzo investidor responde o compromiso do Goberno de actuar alí onde sexa necesario, con intervencións tanto puntuais como de maior alcance, para dispor dunhas infraestruturas viarias modernas, seguras e adaptadas ás necesidades da cidadanía.