- A subdelegada do Goberno destacou a coordinación entre todos os axentes implicados e a colaboración dos concellos
- Máis do 98% do territorio de Lugo quedará dentro da franxa de totalidade, o que sitúa a provincia como un dos principais puntos de observación do fenómeno en Galicia
A subdelegada do Goberno en Lugo, Olimpia López, presidiu esta mañá na Subdelegación do Goberno a reunión previa de coordinación da Administración Xeral do Estado (AGE) na provincia ante a eclipse total previsto para o próximo 12 de agosto, un fenómeno astronómico excepcional que terá un gran interese científico, turístico e social.
A subdelegada subliñou a importancia da organización e da coordinación entre administracións “ante un acontecemento que non se produce na Península Ibérica desde hai máis de 120 anos e que sitúa á provincia de Lugo como un dos lugares privilexiados para a súa observación”. Garantir a seguridade, continuou, “é fundamental para favorecer a mellor experiencia posible para a cidadanía”.
O encontro reuniu representantes dos organismos da Administración Xeral do Estado implicados na preparación do operativo, entre eles a Garda Civil e Subsector de Tráfico, a Policía Nacional, Protección Civil, Capitanía Marítima, a Xefatura Provincial de Tráfico e a Inspección Provincial de Telecomunicacións, ademais de ademais de representantes de Emerxencias da Xunta de Galicia e da Deputación de Lugo, co obxectivo de iniciar a planificación do dispositivo que permita garantir a seguridade, a mobilidade e a correcta organización deste día.
Durante a reunión, analizouse a situación actual dos puntos de observación habilitados na provincia, así como os accesos aos mesmos e a previsión de desprazamentos de persoas. Ademais, lembrouse a importancia de divulgar as recomendacións científicas para unha observación segura do fenómeno. Neste sentido, Olimpia López quixo insistir no uso imprescindible de lentes homologadas para evitar danos oculares.
Durante os últimos meses, a subdelegada do Goberno en Lugo mantivo reunións cos alcaldes e alcaldesas dos concellos da provincia, “como administracións máis próximas ao territorio e que mellor coñecen os espazos, accesos e posibles puntos de concentración de persoas”.
Neses encontros, abordáronse as principais recomendacións de seguridade e mobilidade que deberán trasladarse á cidadanía. Entre elas, destaca a conveniencia de planificar os desprazamentos con antelación e evitar viaxar o mesmo día do evento, debido á previsión de alta intensidade de tráfico. Así mesmo, incidiuse na necesidade de extremar a precaución na condución, especialmente pola escuridade repentina que provocará o fenómeno.
Tamén se recomendou promover a descarga da aplicación AlertCops, que permite comunicar incidencias de maneira rápida ás forzas e corpos de seguridade.
Datos da observación
Segundo os datos do Instituto Xeográfico Nacional (IGN), o 56,3% do territorio galego poderá observar a eclipse total, unha porcentaxe que supera o 98% na provincia de Lugo, o que converte este territorio nun dos principais puntos de visualización do fenómeno. De feito, case a totalidade dos concellos quedarán dentro da franxa de totalidade.
Ademais, a duración da fase de eclipse total variará segundo o punto de observación e oscilará entre os 9 segundos e o minuto e 49 segundos na zona da Mariña de Lugo, unha das áreas nas que o fenómeno poderá observarse durante máis tempo.
A cidadanía pode consultar información detallada sobre horarios, parámetros técnicos e recomendacións para unha correcta observación da eclipse na web oficial habilitada polo Instituto Xeográfico Nacional: https://eclipses.ign.es/.