- A subdelegada destaca o labor fundamental deste servizo na coordinación da loita contra a violencia de xénero na provincia de Lugo
A subdelegada do Goberno en Lugo, Olimpia López, deu a benvida a Rosa María Rivas como xefa da Unidade de Violencia contra a Muller da Subdelegación do Goberno en Lugo, tras a publicación do nomeamento no BOE do día de onte.
Olimpia López destacou o importante labor deste servizo da Subdelegación do Goberno, que se ocupa de coordinar a loita contra a violencia de xénero na provincia de Lugo e destacou “a gran responsabilidade que asume Rosa á fronte deste servizo prioritario, no que traballará man a man coas forzas e corpos de seguridade do Estado, a Xustiza e o resto das administracións públicas, na protección das vítimas da violencia machista”.
A subdelegada subliñou que Rosa María Rivas é a profesional persoa idónea para asumir esta responsabilidade pola súa formación en materia de Igualdade, o seu gran coñecemento da provincia e a súa dilatada experiencia profesional na Administración do Estado.
A nova responsable da Unidade contra a Violencia sobre a Muller, que sucede no cargo a María Luisa Castro, é natural de Lugo e traballa na Subdelegación do Goberno desde 2012. Rosa María Rivas é funcionaria da Administración do Estado desde 2006 e, nos últimos anos, desempeñara o cargo de Xefa da Sección de Estranxeiría.
Dentro da súa formación en materia de Violencia de Xénero e Igualdade figura a realización de diversos cursos impartidos polo ministerio de Política Territorial e o ministerio de Igualdade, sobre uso non sexista da linguaxe e igualdade de oportunidades, entre outros temas.