La subdelegada en Lugo, Isabel Rodríguez, presentou esta mañá o acto de posta en marcha da receita electrónica concertada de MUFACE na provincia, onde se realizou a primeira dispensación electrónica a un mutualista lucense adscrito á opción concertada. Isabel Rodríguez destacou que “este avance permite unha maior comodidade, seguridade e eficiencia para o persoal médico e farmacéutico, á vez que reforza o compromiso do Goberno coa modernización dos servizos sanitarios”.
No acto participaron tamén a directora do servizo provincial de MUFACE en Lugo, Noemí Fraga; o presidente do Colexio oficial de Farmacéuticos de Lugo, Alejandro Sánchez; representantes das entidades aseguradoras ADESLAS e ASISA, e o mutualista Manuel Pérez, quen recolleu a súa medicación como primeiro usuario do novo sistema.
Rodríguez lembrou que a implantación da e-receita concertada “evita desprazamentos ás consultas médicas, facilita o seguimento dos tratamentos e reduce a burocracia, garantindo ao mesmo tempo a trazabilidade e seguridade dos medicamentos”. Neste sentido, agradeceu a colaboración do Colexio de Farmacéuticos e de Médicos para facer posible esta iniciativa de MUFACE.
Este sistema, que xa funciona noutras comunidades como Asturias, Canarias, Navarra ou Murcia, permite ás persoas mutualistas de opción concertada obter as súas receitas de forma dixital tras ser prescritas polos facultativos das aseguradoras. Unha vez activada a receita, dispoñen de dez días para retirar o medicamento en farmacia, e no caso de tratamentos crónicos poderán recollelo mensualmente durante ata un ano.
En Lugo, beneficiaranse desta medida máis de 6.800 persoas, que a partir de agora poderán acceder á medicación coa mesma comodidade que o resto da poboación.
La subdelegada do Goberno en Lugo xa presentou esta medida o pasado 1 de xullo na Delegación do Goberno en Galicia, nun acto institucional con representantes de MUFACE, das aseguradoras e dos colexios profesionais galegos. A implantación da receita electrónica concertada supón un novo paso na estratexia do Goberno de España para avanzar na dixitalización dos servizos públicos, especialmente no ámbito sanitario.