La subdelegada do Goberno nA Coruña, María Rivas, participou esta mañá no acto de apertura da Xornada sobre o presente e o futuro das comunidades enerxéticas, celebrada no Concello de Ames, onde destacou o papel estratéxico que teñen estas iniciativas para a transformación do modelo enerxético no país.
“O impulso das comunidades enerxéticas é unha prioridade clara para o Goberno de España. Proba diso é o investimento de 100 millóns de euros que o Ministerio para a Transición Ecolóxica leva destinado a promover este tipo de proxectos que pon á cidadanía no centro da transición enerxética”, destacou.
Durante a súa intervención, puxo como exemplo o traballo realizado polo Concello de Ames, que creou a súa Oficina de Transformación Comunitaria, un espazo de apoio e asesoramento para axentes locais que desexen crear comunidades enerxéticas. Esta oficina conta cunha subvención de 80.000 euros do Instituto para a Diversificación e o Aforro da Enerxía (IDAE), no marco do Plan de Recuperación, Transformación e Resiliencia.
Ademais, destacou o convenio de colaboración entre o IDAE, o Concello de Ames e a Deputación da Coruña para o desenvolvemento das actividades desta oficina, cun investimento total de 145.200 euros, dos que 80.000 euros proceden do IDAE, 40.000 do Concello e 25.200 da Deputación.
“As comunidades enerxéticas non só achegan enerxía limpa e de proximidade, senón que tamén contribúen ao aforro das familias, pemes e administracións, xerando beneficios económicos, sociais e ambientais para o conxunto da veciñanza”, sinalou.
A xornada contou coa participación de profesorado universitario e expertos de primeiro nivel, que trataron temas como as renovables, a eficiencia enerxética ou a mobilidade sustentable no marco das comunidades enerxéticas. A representante do Goberno finalizou a súa intervención desexando aos asistentes “unha xornada intensa, participativa e, sobre todo, útil para seguir avanzando con rigor cara a unha transición máis xusta e máis próxima á xente”.
María Rivas destaca en Ames a importancia das comunidades enerxéticas como motor de transformación local
04/06/2025
La subdelegada destacou que o impulso das comunidades enerxéticas é unha prioridade para o Ministerio para a Transición Ecolóxica e o Reto Demográfico O Goberno leva investidos 100 millóns de euros para fomentar este modelo participativo, sustentable e de aforro Ames é un exemplo destacado a nivel local grazas á creación da súa Oficina de Transformación Comunitaria, financiada polo IDAE a través do Plan de Recuperación La xornada reúne a expertos universitarios e técnicos especializados para abordar con rigor e criterio os retos das comunidades enerxéticas