"O subdelegado do Goberno en Ourense, Eladio Santos, asistiu este venres ao comezo das obras de humanización do primeiro tramo da Avenida de Portugal de Ourense, intervención incluída na serie de actuacións subvencionadas polo programa de axudas do Ministerio de Transportes e Movilidad Sostenible, no marco do Plan de Recuperación, Transformación e Resiliencia. Alí, Santos destacou "o esforzo investidor" do Goberno de España para facer de Ourense "unha cidade máis amable para as persoas".
Durante a súa intervención, o subdelegado cifrou en máis de 4,2 millóns de euros os fondos investidos polo Executivo central en Ourense no programa de axudas a municipios para as zonas de baixas emisións. En concreto, concedéronse cinco axudas: humanización da rúa Alejandro Pedrosa e Avenida de Portugal (2.217.866,71 euros), a implantación dunha Zona de Baixas Emisións (ZBE) (738.867,65 euros), o aparcadoiro disuasorio no Parque Coto de Canedo (549.727,64), mobilidade vertical para salvar diferenzas de nivel entre distintos puntos da cidade (426.302,20 euros) e a implantación dun Sistema de Bicicleta Eléctrica Pública en Ourense (279.286,91 euros).
Neste sentido, Eladio Santos resaltou que "o Goberno de España ten claro que debe investir cando hai un proxecto importante para a mellora da mobilidade na cidade de Ourense". Por iso, sempre apoia "os proxectos de envergadura", como a estación de tren, a chegada da alta velocidade, a mellora das comunicacións por estrada, investimentos no Museo Arqueolóxico e na estación de Santo Francisco.
No entanto, o subdelegado asegurou que bota de menos investimentos reais da Xunta de Galicia na cidade, "investimentos transformadores como as que está a facer o Goberno de España". Ademais, agradeceu ao alcalde de Ourense, Gonzalo Pérez Jácome, a invitación ao acto dunha actuación cofinanciada, "algo que debería ser o habitual e que non ocorre coa Xunta, que esconde a orixe dos fondos do Goberno e non convida os representantes gobernamentais ás convocatorias". "Lamento que o Executivo galego descoñeza á lealdade institucional", concluíu.