O delegado do Goberno en Galicia, Pedro Blanco, destaca o impulso do Goberno á formación no sector agroalimentario de Galicia con catro novos proxectos de innovación. Estas iniciativas son froito dunha convocatoria de axudas do Ministerio de Agricultura, Pesca e Alimentación para desenvolver proxectos de intercambio de coñecemento e formación, dotada cun total de 5,6 millóns de euros.
Pedro Blanco resaltou a aposta do Ministerio por unha formación de calidade no seu obxectivo de mellorar a competitividade dun sector tan importante para Galicia como é o agroalimentario. Puxo de relevancia tamén o fundamental que é para o rural galego este tipo de accións, que dinamizan un campo produtivo de tanta importancia nos pequenos concellos da comunidade.
Galicia suma catro proxectos favorecidos polas subvencións, que inclúen once empresas ou institucións de diferentes campos dentro do sector. La axuda para estas entidades galegas suman preto de 750.000 euros. O abanico das iniciativas vai desde a da Asociación de Desenvolvemento Galicia Suroeste Eurural GDR 14, que impulsa unha acción de intercambio de coñecementos para o desenvolvemento de modelos de promoción para a adhesión ás denominacións de orixe e ás indicacións xeográficas protexidas en zonas rurais de interese estratéxico (cunha subvención de 143.993,71 euros); ata a de Crecer Smart Solutions, S.L., que promove a innovación e transferencia de coñecemento en sustentabilidade para o sector agrogandeiro lácteo (326.777,11 €), ou a de Unións Agrarias-UPA, de impulso á rexeneración ambiental, o relevo xeracional e o reto demográfico (168.426,50 €).
O Ministerio resaltou especialmente a da Fundación Juana de Veiga, pois inclúe a celebración de 12 xornadas e seminarios técnicos para o impulso á agricultura rexenerativa e sustentable en diferentes sectores produtivos agropecuarios (gandaría de leite, de carne, horticultura, fruticultura e viticultura). Para o desenvolvemento destas actividades a subvención concedida é de 104.823,69 euros.
Novas axudas para proxectos de innovación
En paralelo, Pedro Blanco animou ás empresas e institucións galegas vinculadas ao sector agrícola e gandeiro a interesarse e solicitar as novas axudas para proxectos de innovación que acaba de anunciar o Ministerio, dotadas con 46,5 millóns de euros. Trátase da convocatoria con maior dotación orzamentaria da historia neste campo de apoio, que está encadrada no alicerce de desenvolvemento rural da Política Agraria Común (PAC).
O Ministerio avanza que o prazo de presentación das solicitudes estará aberto ata as 14.00 horas do día 4 de xuño. O límite máximo de axuda por agrupación beneficiaria fíxase en 600.000 euros e os proxectos poderanse executar ata o 1 de maio do ano 2029. O habitual é que o proxecto se deseñe dividindo o período subvencionable en dous: un desde o seu inicio ata o 1 de maio de 2027 e outro desde ese momento ata, como máximo, o 1 de maio de 2029.
Propósito das axudas
Las axudas están incluídas no Plan Estratéxico Nacional da Política Agraria Común (PAC) e están financiadas nun 43% polo Fondo Europeo Agrícola de Desenvolvemento Rural (FEADER) e no 57% restante polos orzamentos comúns do Ministerio. O obxectivo é fomentar a transferencia de coñecemento por medio de intercambios en clave autonómica e estatal, como eventos, feiras, actividades divulgativas ou días de portas abertas, orientados todos estes eventos ou propostas á adopción de tecnoloxías dixitais ou outras temáticas. Todos están centrados na adquisición de habilidades dixitais para o sector agroalimentario e serán de acceso gratuíto para os interesados.
A convocatoria estivo destinada a entidades con capacidade de facilitar o intercambio de coñecemento en cuestións consideradas prioritarias neste ámbito para o Goberno, tanto dixitais como retos estruturais críticos para o desenvolvemento das zonas rurais. O obxectivo destas subvencións é reforzar o Sistema de Coñecemento e Innovación en Agricultura (SCIA, máis coñecido polas súas siglas en inglés como AKIS) a nivel nacional e favorecer a aprendizaxe entre actores de distintos territorios. Os beneficiarios poderán executar estas axudas desde o momento que as solicitaron ata xuño de 2026.