El delegado do Goberno en Galicia, Pedro Blanco, manifestou o seu compromiso de intervir para axilizar a mellora prevista no pavimento da estrada N-640. Nunha reunión de traballo celebrada esta mañá na Subdelegación do Goberno en Pontevedra, na que participou tamén o subdelegado, Abel Losada, o alcalde de Cuntis, Manuel Campos, e o xefe da Demarcación de Estradas do Estado en Galicia, Anxo González do Río, Pedro Blanco recolleu as demandas do municipio termal sobre esta vía.
El delegado sinalou que “unha das nosas principais preocupacións relativas as infraestruturas é o estado dos firmes das estradas”, á vez que incidiu en que “somos especialmente conscientes das necesidades de Cuntis”. Neste sentido, avanzou que xa existe un contrato de servizo de firmes que previsiblemente comezará a executarse esta primavera, afectando a diversos tramos da N-640 en Cuntis e outros municipios de Deza e Tabeirós. Esta actuación permitirá paliar os danos máis graves e urxentes nos pavimentos desta estrada.
Paralelamente, tanto a Delegación do Goberno como a Subdelegación están a realizar xestións para axilizar un contrato de rehabilitación integral do firme da N-640, que actualmente se atopa en fase de redacción por parte do Ministerio de Transportes. Este contrato ten como obxectivo a mellora integral da estrada nacional nas comarcas do Deza, Tabeirós-Terra de montes e Caldas.
Ademais, acordouse acelerar a execución do contrato común de mantemento, que conta cun orzamento de 8 millóns de euros destinado á conservación da N-640 na zona norte da provincia. Estas medidas buscan garantir que esta vía, de alto tráfico, recupere as mellores condicións posibles.
Por último, na reunión tamén se abordaron outras infraestruturas de competencia estatal en Cuntis, como a variante e a travesía, sobre as que proximamente haberá novidades.
El delegado do Goberno lembrou que durante o mandato de Mariano Rajoy o orzamento para o mantemento de estradas foi recortado ata mínimos históricos, o que ten consecuencias visibles no estado actual das infraestruturas. O Goberno de Pedro Sánchez está a traballar para recuperar ese orzamento perdido, sendo conscientes da complexidade do proceso.