Abel Losada anuncia que as obras do nó de Bomberos comezan o vindeiro luns

El subdelegado do Goberno en Pontevedra, Abel Losada, vén de informar de que as obras de remodelación da ligazón norte de Pontevedra da AP-9, coñecido popularmente como nó de Bombeiros, darán comezo o vindeiro luns, día 29. O delegado do Goberno en Galicia, Pedro Blanco, supervisará o inicio do proxecto, xunto con o subdelegado e o xefe da Demarcación de Estradas en Galicia, Anxo do Río, cunha visita que terá lugar ás 11.30 horas. Ao acto está convidado o alcalde de Pontevedra, #Miguel Anxo Fernández Lores.
Losada subliñou que “o vindeiro luns se saldará unha débeda histórica con esta cidade”. “O Goberno de Pedro Sánchez cumpre con Pontevedra; cumpre o que promete e, ademais, cumpre as promesas incumpridas de outros”. A este respecto lembrou que o Goberno de Rajoy propuxo unha obra bastante máis modesta, de apenas 6 millóns de euros, e pretendía financiala con subidas de peaxes. “Agora falamos dunha obra de 10 millóns de euros á vez que se aplican na AP-9 as maiores bonificacións da historia”. O subdelegado do Goberno recalcou que “hai que dicir alto e claro que esta obra estaba bloqueada polo anterior Goberno e que houbo un traballo calado para sacar adiante e fai falta citar aquí á anterior subdelegada, Maica Larriba”.
O subdelegado recalca que o novo deseño do nó de Bombeiros vai supor unha mellora transcendental na seguridade e fluidez dos fluxos de acceso e saída a Pontevedra, grazas a unha nova infraestrutura de moita maior capacidade e eficiencia.
Losada lembrou que se trata dunha infraestrutura de gran complexidade técnica, que obrigará á posta en marcha dun plan de tráfico durante a súa execución. A obra supón un investimento total de 9,9 millóns de euros. Foi adxudicada á empresa Comsa.