O novo modelo do Rexistro Civil chega xa ao 80% da poboación da provincia

O novo modelo de Rexistro Civil, impulsado polo Ministerio da Presidencia, Xustiza e Relacións coas Cortes, alcanza xa a case o 80% da poboación da nosa provincia, grazas á progresiva implantación de Dicireg, un sistema integral de tramitación de expedientes por vía electrónica que contribúe a achegar este servizo á cidadanía, con independencia do seu lugar de residencia.
Esta semana, o Boletín Oficial do Estado (BOE) publicou as resolucións polas que se acorda a entrada en servizo da aplicación informática Dicireg nas oficinas do Rexistro Civil de Cangas e Vilagarcía, que se unen ás dos partidos xudiciais de Ponteareas, Lalín, Cambados, Pontevedra, Marín e Vigo, xa integradas xa neste sistema. En total, 8 dos 13 partidos xudiciais da provincia, que abarcan 42 concellos, xa están adheridos ao novo modelo. Espérase que antes de xuño de 2025 todos os Rexistros Civís estean integrados no novo sistema.
Novo Rexistro Civil
O Ministerio de Xustiza está inmerso nun importante proxecto de modernización do Rexistro Civil que supón un cambio do modelo que actualmente coñecemos co obxectivo de que sexa máis áxil e próximo aos cidadáns e cidadás. Este novo Rexistro Civil configúrase como gratuíto, único e electrónico, e permite a interoperabilidade entre administracións públicas, simplificando así os procedementos, axilizando os trámites e contribuíndo á eliminación de desprazamentos e a diminución de tempos de espera para as persoas usuarias. Entre outras cousas, Dicireg permite unha integración plena e automática con documentos como o padrón municipal.
Está baseado, ademais, no rexistro individual, mediante o cal cada persoa se identifica de forma unívoca polo seu código persoal, e permite dar fe dos feitos e actos do estado civil de cada quen ordenados de forma lóxica e cronolóxica.
Os novos expedientes son totalmente electrónicos e a información rexistral ten formato dixital, posibilitando así o acceso telemático mediante identificación electrónica á cidadanía. No entanto, consérvase o número e a localización das oficinas existentes, así como persoal que presta os seus servizos nesta institución. Neste sentido e co obxectivo de contribuír á cohesión territorial e dixital, mantense unha oficina do Rexistro Civil en cada municipio, garantindo o acceso a toda a cidadanía.