Ourense, 6 de marzo de 2024.- O Subdelegado do Goberno en Ourense, Emilio González, inaugurou hoxe a xornada sobre o “Marco xurídico aplicable ás mulleres estranxeiras vítimas de violencia de xénero”, que tivo lugar na sede da subdelegación do Goberno, e no que participaron máis de 50 profesionais, representantes de institucións e das Forzas e Corpos de Seguridade do Estado.
Durante a súa intervención, Emilio González destacou que “se miramos as cifras de mulleres estranxeiras vítimas de violencia de xénero, unha de cada catro mulleres que hoxe necesita algún tipo de protección a través do sistema VioGén, son mulleres estranxeiras”.
Actualmente hai 425 casos activos que representan "425 razóns moi poderosas para que traballemos cada día para apoialos, axudalos, protexelos e brindarlles todo o que un Estado de Dereito, que unha sociedade moderna como a nosa, débelle a calquera dos seus concidadáns: seguridade, saúde, traballo, vivenda, dignidade, recoñecemento..."
O subdelegado tamén quixo destacar as autorizacións de residencia e traballo concedidas a mulleres estranxeiras vítimas de violencia de xénero, indicando que o seu crecemento continúa desde 2006. En total concedéronse 915 en Galicia.
Con todo, quixo subliñar que "cando falamos de axudar a mulleres vítimas de violencia machista nunca se pode ser compracente co traballo realizado, porque sempre hai moito máis por facer".
Emilio González quixo convidar a traballar conxuntamente para protexer a estas mulleres, lembrando que é "crucial recoñecer e visibilizar a súa especial vulnerabilidade e traballar xuntos desde todos os ámbitos da administración, para protexelas con independencia da súa orixe ou situación migratoria, pero sen deixar de recoñecer que este status comporta maiores dificultades”.
Finalmente, o subdelegado agradeceu a asistencia dos concelleiros e responsables de servizos sociais dos diferentes municipios; ao persoal dos centros de información á muller; a membros das Forzas e Corpos de Seguridade do Estado; e os directores das distintas áreas da Delegación e Subdelegación do Goberno.
La actividade estivo coordinada pola xefa da Unidade de Violencia de Xénero da delegación do Goberno, María Alida Iglesias. O informe principal correu a cargo da xefa de Asuntos Exteriores da Subdelegación do Goberno en Ourense, Josefina Rodríguez Durán.