O delegado do Goberno en Galicia, Pedro Blanco, nomeou hoxe a Abel Losada novo subdelegado do Goberno na provincia de Pontevedra. O delegado transmitiulle este nomeamento persoalmente nunha reunión que mantiveron esta tarde na sede da Delegación do Goberno e na que Pedro Blanco aproveitou para trasladarlle os obxectivos de cara á nova etapa que se abre nesta Subdelegación.
O delegado trasladou ao novo subdelegado a esixencia de impulsar os proxectos do Goberno para a provincia de Pontevedra. Con el repasou os principais investimentos e programas planificados para a provincia co obxectivo de que estes proxectos e compromisos se traduzan nunha mellora para a cidadanía, as empresas e as administracións da provincia, sobre todo os concellos.
Pedro Blanco destacou do novo subdelegado a súa longa experiencia política e de xestión pública, en distintos niveis da Administración, tanto autonómico como local. Tamén sobresae a súa extensa formación en temas relacionados coa economía e a demografía, á que se engade o seu fondo coñecemento da realidade da provincia de Pontevedra a todos os niveis, tanto a nivel interno como das relacións co resto de provincias galegas e o norte de Portugal.
O delegado amosou a súa satisfacción por esta incorporación, relevando á anterior subdelegada, Maica Larriba, quen cesou por xubilación o pasado 31 de agosto. Pedro Blanco reiterou o recoñecemento ao traballo desenvolvido por Maica Larriba nestes anos, exemplo de profesionalidade e de servizo público á provincia.
Durante estes meses exerceu o cargo de subdelegada en funcións María Isabel Alonso, secretaria xeral desta Subdelegación. O delegado agradeceu o seu traballo para dar continuidade aos servizos do organismo e na dirección das súas competencias.
Abel Losada
O novo subdelegado do Goberno na provincia de Pontevedra naceu en Ourense en 1964. É doutor en Ciencias Económicas pola Universidade de Santiago de Compostela e profesor Titular de Historia e Institucións Económicas, na Facultade de Ciencias Económicas e Empresariais da Universidade de Vigo.
É especialista en demografía, economía da poboación e economía empresarial, área na que publicou numerosos artigos e estudos e na que participou en congresos e seminarios, tanto nacionais como internacionais.
Foi deputado no Parlamento de Galicia entre 2005 e 2020, tempo no que ocupou varios cargos parlamentarios. Tamén foi director xeral de Gabinete da Presidencia da Xunta de Galicia nos anos 2008 e 2009, e concelleiro en tres lexislaturas diferentes no Concello de Vigo, cargo que ocupaba na actualidade.