La subdelegada do Goberno nA Coruña, María Rivas, mantivo unha reunión de traballo no Colexio oficial de Psicoloxía de Galicia, para facer unha valoración do programa de quenda de garda psicolóxica en violencia de xénero. Na reunión estivo presente a decana do colexio, Rosa Álvarez, a coordinadora e coordinador do programa, Fátima López e Rubén Villar, e a xefa da Unidade contra a Violencia de Xénero da subdelegación, Isabel Álvarez.
Este programa, que conta con fondos do Pacto de Estado contra a Violencia de Xénero, é un servizo co que contan as mulleres vítimas desta violencia e que lles permite contar con asesoramento e apoio psicolóxico con carácter inmediato no momento da denuncia a condición de que o soliciten.
María Rivas subliñou a importancia de que as mulleres vítimas de violencia saiban que no momento da denuncia teñen dereito a contar con asistencia psicolóxica por parte dun especialista. A subdelegada lembrou tamén que son as forzas e corpos do estado quen están habilitados a pór en efecto este recurso.
A este respecto, na reunión de hoxe acordáronse diferentes liñas de actuación para profundar nun maior coñecemento e difusión deste recurso que está operativo 24 horas, os 365 días ao ano cunha chamada gratuíta ao Teléfono de Información ás Mulleres 900 400 273.