A subdelegada do Goberno nA Coruña, María Rivas visitou esta mañá as oficinas de Tragsa en Culleredo para supervisar xunto ao xerente provincial, Pedro Álvarez, e o xerente territorial de Tragsatec, Fernando Ron, o programa de asesoramento técnico dirixido a municipios de menos de 5.000 habitantes que impulsa o Goberno para dinamizar e apoiar a súa participación nas convocatorias do Plan de Recuperación. Neste encontro de traballo tamén estivo presente o resto do equipo que desenvolve este traballo na provincia.
María Rivas resaltou a importancia deste traballo de asesoramento destinado aos concellos con menos poboación e, por tanto, os que menos recursos e máis dificultades teñen para xestionar eses fondos. Para a subdelegada do Goberno, o labor que desenvolve Tragsa nestes municipios máis pequenos “é unha ferramenta fundamental para que as entidades locais conten con maior capacidade e máis coñecemento para sacarlle o máximo rendemento aos fondos de recuperación, priorizando obxectivos e adaptándose ás circunstancias e necesidades específicas de cada municipio”.
María Rivas tamén fixo fincapé na importancia de que todos os concellos estean ben asesorados e informados para “aproveitar ao máximo todas as convocatorias” “O obxectivo é que cada céntimo destes fondos chegue a cada recuncho da provincia e a toda a cidadanía”, engadiu a subdelegada. Desde o pasado 15 de marzo, Tragsa oferta este servizo de asistencia técnica, a través da súa filial Tragsatec. Para poder acceder a esta asistencia, as entidades deben adherirse voluntariamente ao programa do Ministerio de Facenda e Función Pública.
Tragsa encárgase de axudar en todo o proceso ás entidades adheridas, desde as convocatorias ata a resolución, con especial incidencia no manexo da plataforma CoFFEE, un sistema de información integrado no que os xestores designados por cada administración, previa formación, dan conta do avance dos proxectos. Tamén velará polo cumprimento do código de boas prácticas e das obrigas de xestión do Plan de Recuperación.
Hasta o momento, son 14 os concellos da provincia adheridas a este programa orientado principalmente aos concellos de menos de 5.000 habitantes, pero que tamén está aberto a outros de máis poboación. Bergondo, Cabana de Bergantiños, Cabanas, A Capela, Corcubión, Curtis, Fisterra, Frades, Lousame, Moeche, Porto do Son, Sobrado, Tordoia, Vilarmaior son os concellos que polo de agora asinaron xa o protocolo de adhesión.